Երբ տեղի կունենան ավարտական քննությունները, սկսվել է ուսուցիչների կամավոր ատեստավորման հայտագրումը. ԱՆդրեասյան

ԿԳՄՍ փոխնախարար Ժաննա Անդրեասյանը այսօր հրավիրված մամուլի ասուլիսում խոսել է հանրակրթության ոլորտի բարեփոխումների ներկա փուլի մասին, ազդարարել ուսուցչի կամավոր ատեստավորման 2022 թվականի հայտերի ընդունման մեկնարկը, անդրադարձել կրթության իրավական նոր կարգավորումներին, 2021-22 ուսումնական տարվա ավարտի նախապատրաստական աշխատանքներին:

Այսօրվանից սկսվել է ուսուցիչների կամավոր ատեստավորման հայտագրումը.

էլկտրոնային մատյանում արդեն ավելացվել է այն սյունակը, որով ուսուցիչները հնարավորություն են ստանում նշում անել, որ ցանկանում են մասնակցել կամավոր ատեստավորմանը: Անդրեասյանը շեշտել է՝ այս առումով ուսուցիչների համար նախարարության կայքէջում կա ուղեցույց:

«Մեր բոլոր ուսուցիչները կարող են շատ պարզ տեսողական տեսնել, թե գործընթացն ինչպես կարող են անել: Ատեստավորումն իրականացնելուց առնվազն 20 օր առաջ կհրապարակվեն կամավոր ատեստավորման ուղեցույցները: Դրանք ներկայացնելու են թեստերի կառուցվածքը, առաջադրանքներում ընդգրկվող նյութը, ձեւաթղթի լրացման կարգը եւ առաջադրանքների նմուշները: Բուն ատեստավորման գործընթացը նախատեսում ենք, որ կանցկացվի սեպտեմբերին, եւ հոկտեմբերից սկսած՝ նրանց աշխատավարձերը և հավելավճարները կհաշվարկվեն՝ ըստ իրենց ցուցաբերած արդյունքների»,- ասել է փոխնախարարը:

Նա շեշտել է՝ այս տարի կամավոր ատեստավորման համար կարող են դիմել 5-12-րդ դասարաններում դասավանդող բոլոր ուսուցիչները: Ատեստավորումը հիմնականում լինելու է թեստավորման եղանակով, սակայն ֆիզկուլտուրա, ՆԶՊ, երաժշտություն, կերպարվեստ, տեխնոլոգիա առարկները դասավանդող ուսուցիչների թեստավորումը կլինի ոչ թեստային եղանակով, այսինքն՝ գործնական աշխատանքներ, բաց և փակ հարցեր:

Կամավոր ատեստավորում անցած և 70 տոկոսից բարձր բալեր հավաքած ուսուցիչների աշխատավարձի դրույթը կլինի 200 հազար, որին կգումարվի 30-50 տոկոս հավելավճարը:

Երբ է մեկնարկելու առաջին դասարան հաճախող երեխաների համար առցանց հայտագրումը.

Այն կիրականացվի երեք փուլով: Հունիսի 21-ից կբացվի առաջին դասարանների հայտարարագրման կայքը:

«Ծնողներն այս ընթացքում կարող են ստուգել իրենց երեխաների տվյալները, և պիտի խնդրեմ, որ լինեն հետևողական, որովհետև լինում է  այնպես, որ երեխայի տվյալները թվայնացված չեն լինում, պահանջվում է որոշակի ժամանակահատված քաղաքացիական կացության ակտերի գրասենյակների կողմից թվայնացման համար: Դա իրականացվում է 3 օրվա ընթացքում: Ստուգումը կարելի է անել stugum.emis.am կայքի միջոցով: Հայտարարագրումը բաց կլինի առաջնահերթություն ունեցող բոլոր քաղաքացիների համար: Առաջնահերթություն դիտարկվում է նույն դպրոցում սովորող քույր կամ եղբայր ունենալու հանգամանքը, ինչպես նաև տվյալ դպրոցում աշխատող ծնող ունենալու հանգամանքը: Այս փուլով հայտագրումը կիրականացվի 14 օրվա ընթացքում»,- մանրամասնել է Անդրեասյանը:

Նրա խոսքով՝ հուլիսի 6-ից առաջին դասարանցիների հայտագրման գործընթացը կիրականացվի ընդհանուր հիմունքներով հայերեն ուսուցում իրականացնող հանրակրթական հաստատություններ դիմող բոլոր առաջին դասարանցիների համար: Հուլիսի 12-ից հայտագրման գործընթացին կկարողանան միանալ նաև օտարերկրյա քաղաքացիների, երկքաղաքացիների, քաղաքացիություն չունեցող անձանց, ինչպես նաև ազգային փոքրամասնությունների ներկայացուցիչների երեխաները, որոնց համար ուսուցման լեզուն կարող է լինել ոչ հայերենը: Սա տարածվում է նաև այն երեխաների վրա, որոնց ծնողներից մեկը ՀՀ քաղաքացի է, մյուսը՝ ոչ:

«Հայտագրման համակարգը չի փակվելու, այն գործում է ողջ ուսումնական տարվա ընթացքում, և մեր երեխաները ամբողջ ուսումնական տարին կարող են ընդգրկվել դպրոցում, ինչպես պահանջում է երեխայի լավագույն շահը»,- հավելել է նա:

Ավարտական և կենտրոնացված քննությունները կանցկացվեն հունիսի 3-ին և հունիսի 6-ին.

Բոլոր հնգօրյա աշխատող հաստատություններում ակնկալվում է, որ  այս տարվա հունիսի 3-ին կանցկացվեն ավարտական և կենտրոնացված քննությունները, իսկ վեցօրյա աշխատանքային շաբաթ ունեցող հաստատություններում դրանք կանցկացվեն հունիսի 6-ին:

«Արդեն իսկ պարզ են չորրորդ դասարանցիների գիտելիքների ստուգման օրերը, մենք նախատեսել ենք մայրենիի և մաթեմատիկայի գրավոր քննությունները անցկացնել հունիսի 10-ին և 13-ին: 9-րդ դասարանի ավարտական քննությունների օրերը նույնպես հայտնի են: Այս տարի մենք ունենք երկու կենտրոնացված քննություն 9-րդ դասարանում՝ «Հայոց լեզու և գրականության» և  «Մաթեմատիկա»: Հայոց լեզվի կենտրոնացված քննությունը կլինի հունիսի 28-ին, մաթեմատիկայի քննությունը՝ հունիսի 30-ին: Ավելացնեմ, որ հունիսի 8-ից սկսվում են նաև մնացած առարկաների քննությունները, որոնք կկազմակերպվեն հենց դպրոցներում»,- ասել է Ժաննա Անդրեասյանը:

Փոխնախարարի խոսքով՝ այս տարի 12-րդ դասարանը կավարտի շուրջ 21 հազար շրջանավարտ, 9-րդ դասարանը՝ 34,500-ից ավել աշակերտ:

«Հայոց լեզու և գրականության» առարկայի ավարտական քննությունը հունիսի 8-ին է, «Հայոց պատմություն» առարկայի քննությունը՝ հունիսի 15-ին, «Մաթեմատիկա» առարկայի քննությունը՝ հունիսի 22-ին: Առաջիկայում կհրապարակվեն նաև միասնական քննությունների օրերը, որոնք նախարարությունը լրացուցիչ կիրազեկի: