«Եթե ուժեղ էր բանակը, ինչո՞ւ էինք երգելու Ստեփանակերտ-Ստեփանակերտ». վարչապետի արձագանքը՝ Սերժ Սարգսյանին

Այսօր Ազգային ժողովում Կառավարության հետ հարցուպատասխանի ժամանակ «Քաղաքացիական պայմանագիր» խմբակցության պատգամավոր Վահագն Ալեքսանյաննը վարչապետ Նիկոլ Փաշինյանին խնդրեց անդրադառնալ Սերժ Սարգսյանի այն հայտարարություններին, թե 44-օրյա պատերազմի ընթացքում զինատեսակներ կան, որոնք չեն օգտագործվել։

«Անվտանգային հարցերից ենք խոսում, ու պարբերաբար նաև խոսվում է բանակից։ Մեր ընդդիմախոսներն էլ են շատ հաճախ խոսում բանակից, Սերժ Սարգսյանն էլ իր հարցազրույցներից մեկում խոսել է բանակից ու իրենց հաջորդած իշխանությանը ժառանգություն թողած բանակին տվել այնպիսի գերադրական որակումներ։ Ես ձեզ կխնդրեմ անդրադառնանք պարոն Սարգսյանի գովերգող կամ տարատեսակ ինչ-որ զինատեսակների տիրապետող բանակի մասին պնդումներին, որոնք, ըստ նրա, իբր 44-օրյա պատերազմի ընթացքում չեն օգտագործվել»,- ասաց Ալեքսանյանը։

Վարչապետը, պատասխանելով հարցին, շեշտեց՝ 44-օրյա պատերազմի ժամանակ զենքի պակաս չի եղել։

«Պարբերաբար այդ քննարկումներն ի հայտ են գալիս, ու հետևյալն է արձանագրվում. ձեր նշած անձը նույնպես խոսել էր դրա մասին՝ ասելով, որ իրենց իշխանության ժամանակ այդ բանակը բոլորովին ուրիշ պատրաստակամության վիճակի էր։ 44-օրյա պատերազմի ընթացքում կամ ավարտից հետո ԼՂ մի բարձրաստիճան պաշտոնյա պատմել էր, թե ինչպես 2016-2017 թվականին մի հավաքի ժամանակ ասել էր, որ, ըստ էության, եթե մենք չգնանք ինչ-որ անհամաչափ զիջումների, «Ղարս-Ղարս» երգը հիշում եք, Ստեփանակերտ-Ստեփանակերտ երգն ենք երգելու։ Այսինքն՝ դա երկու քաղաքական մերձավորների կողմից խոսակցությունն է, իրենց կողմից արտահայտված։ Եթե այդքան ուժեղ ու մարտունակ էր, ինչո՞ւ էինք երգելու Ստեփանակերտ-Ստեփանակերտ։ Մարտունակ բանակի դեպքում բոլորովին այլ երգ էինք երգելու, չեմ ուզում բարձրաձայնել»,- ասաց վարչապետը։

Ըստ նրա՝ հաջորդ կետը, որի մասին շատ է խոսվում, դա ապրիլյան քառօրյա պատերազմն է։ Բայց այդտեղ էլ պետք է արձանագրել, որ եթե ՀՀ-ն հաղթել էր, ինչո՞ւ էր դիվանագիտական սեղանին պատերազմից հետո նորից նույն փաստաթուղթը դրված վատ տարբերակով՝ կապված ԼՂ-ի հետ:

«ՀՀ-ի դիվանագիտական խողովակներով 2016 թվականի հունվարին դրվել է մի փաստաթուղթ ԼՂ հարցի կարգավորման վերաբերյալ, որը Հայաստանը մերժել է աշխատանքային մակարդակով։ Դրանից երկու ամիս հետո սկսվել է պատերազմը, որը մենք հաղթել ենք, բայց դրանից հետո սեղանին է դրվել նույն մերժված փաստաթուղթն ավելի վատ տարբերակով։ Եթե հաղթելու էինք, ինչո՞ւ էր դիվանագիտական ֆրոնտում վերահաստատվել այն տարբերակը, որը ՀՀ-ն մերժել էր։ Մենք չգիտենք՝ այն ժամանակ բանակը ինչ էր ու ինչ էր բանակում»։

Արձագանքելով՝ Ալեքսանյանը նկատեց, որ ԱԳՆ-ում չի պահպանվել որևէ սղագրություն Ռոբերտ Քոչարյանի կամ Սերժ Սարգսյանի բանակցությունների մասով․ «Այստեղից ուրիշ հարց է ծագում՝ այդ բանակցությունների պրոցեսը հանրապետական խմբակցության ղեկավարն այս ամբիոնից անվանել էր «երանելի»։

Վարչապետն էլ նշեց․ «Այստեղ երկու հանգամանք կա․ որևէ մեկը լսել է որևէ զինծառայողից, որ 44-օրյայի ժամանակ զենքի պակաս է եղել, բացառված է։ Որոշ վայրերում զինվորականները միլիարդներով զենքեր են թողել պահեստներն ու փախել։ Չենք տեսե՞լ այդ կադրերը, որտեղ ադրբեջանցիներն իրենց գրաված զորամասն են մտնում ու վիդեոներ են հրապարակում լիքը պահեստներով։ 2016 թվականին չենք հիշո՞ւմ՝ ինչ խոսակցություններ կային, երբ այդ ժամանակվա վարչապետն այս ամբիոնից ասաց՝ դիզվառելիքի խնդիր է եղել»։

Կառավարության ղեկավարը իր խոսքում շեշտեց՝ մինչ իշխանությունը իրենք ընդդիմադիր գործիչներ են եղել, բայց ոչ «5-րդ շարասյուն»։

«Ոչ էլ եղել ենք օտար երկրներից կառավարվող քաղաքական ուժ՝ «պողոսական, սորոսական», որովհետև իրենց քաղաքական գործողության այլ ձև հայտնի չէ. ո՛չ սեփական գաղափար են ունեցել, ո՛չ էլ սեփական տեսլական։ Այլ ձև չգտեն, միայն կառավարվել դրսից կամ երկրում ինչքան բան կա սեփականաշնորհել։ Ես նաև եզրակացության եմ գալիս, որ մեր սպայական դասը իրենք կոտրել են բարոյապես՝ ձեզ հայտնի որոշ գեներալների հրամանատարության ներքո և նրանց աշխատանքային սխեմայով աշխատացնելով»,- ասաց Կառավարության ղեկավարը: