Թույլ չենք տա, որ Հայաստանը կղերապետություն դառնա, ընկրկում չի լինելու եկեղեցականների ցանկության դեմ. Թորոսյան

«Հայկական ժամանակ»-ը ՀՀ Ազգային ժողովի «Քաղաքացիական պայմանագիր» խմբակցության պատգամավոր, ՔՊ վարչության անդամ Արսեն Թորոսյանի հետ զրուցել է Վազգեն (Բագրատ) Գալստանյանի սկսած շարժման, դրա նպատակների և անելիքների մասին:

Հարցազրույցը ներկայացնում ենք՝ ստորև

- Պարոն Թորոսյան, գործող իշխանության ընդդիմախոսները մայիսի 26-ին մեծ հանրահավաք են խոստանում։ Վազգեն (Բագրատ) Գալստանյանը հայտարարել է, որ օրը իրենց համար խորհրդանշական է՝ կապված Ավարայրի ճակատամարտի խորհրդի հետ։ Կարո՞ղ ենք սա այն համատեքստում հասկանալ, որ խորհրդարանական և արտախորհրդարանական ուժերը որոշել են գնալ «ճակատամարտի»՝ հաշվի առնելով այն հանգամանքը, որ անցնող օրերին այդպես էլ չարժանացան հասարակության մեծ մասի ուշադրությանը։

- Նախ նկատենք, որ Հայաստանում երաշխավորված է խաղաղ հավաքներ անցկացնելու իրավունքը, և այդտեղ որևէ քաջագործություն չկա։ Կարծում եմ՝ քանի որ տեսնում են այլ ելք այլևս չկա, չի բացառվում, որ կգնան տարատեսակ բախումների, անօրինական քայլերի։ Այս ամեն ինչում երևում է ընդդիմության քաղաքական սննկացումը․ խոսելով Ավարայրի ճակատամարտի մասին՝ ի՞նչ են ուզում ասել՝ 451 թվականին տեղի ունեցածը փորձելո՞ւ են կրկնել 2024-ին։ Սա պլանների բացակայության մասին է խոսում, պարզապես ցանկանում են հնարավորինս շատ երկարաձգել շարժումը անհասկանալի պատճառներով, քանի որ նույնիսկ այն մարդիկ, որոնք դժգոհ են իշխանություններից, շարժման ներկայացուցիչներից հստակություն չեն ստանում։

- Գալստանյանը նաև հայտարարել է, որ այդ օրը իրենց աջակիցները շատ անելիքների մասին կիմանան, ծրագիր կա դրված սեղանին։ Շարժումը Երևան հասնելուն պես՝ մայիսի 9-ին, դրա առաջնորդը արդեն մատնանշել էր իրենց քայլերը. սկզբում մեկ ժամ ժամանակ տալով վարչապետ Փաշինյանին հրաժարականի համար, հետո անվստահություն հայտնելու մասին հայտարարեցին։ Ի՞նչ նոր անելիքների ու ծրագրերի մասին են այս անգամ խոսելու Գալստանյանը և նրա կողքին գտնվողները այն պարագայում, երբ իրենց ձեռնարկած կամ հայտարարած պահանջները այդպես էլ չեն կատարվում:

- Այո, ճիշտ եք նկատում, նրանց ասելիքները օդում են մնացել։ Առաջին օրվանից խոսում են անելիքներից, բայց խոսում են միայն անելիքները անելու մասին։ Կարող են ամեն ինչ հայտարարել, անել օրենքով սահմանված գործողություններ, իսկ ապօրինի դեպքերի ժամանակ համապատասխան քայլեր կլինեն։ Հիմնականում ասում են մի բան, որ ֆիզիկապես չեն կարող անել․ իմպիչմենտի գնալ չեն կարող, հրաժարականի մասին խոսք լինել ընդհանրապես հնարավոր չէ, քանի որ ունենք լեգիտիմ ընտրված իշխանություն։ Հիմա նման հայտարարություններով անլրջություն են հաղորդում իրենց շարժմանը։ Ըստ էության՝ այս շարժումն էլ չի տարբերվում նախկիններից։ Առաջնորդն է այլ հաստատության ներկայացուցիչ, որ իր և եկեղեցու համբավը փորձեց ծառայեցնել քաղաքականությանը, բայց կորցրեց թե՛ իր, թե՛ եկեղեցու հեղինակությունը։ Դրանից հետո մարդիկ սկսեցին նրա դեմքով ավելի վատ վերաբերվել եկեղեցուն:

- Ըստ Գալստանյանի՝ «մայիսը լավ ամիս է»։ Այս արտահայտության տակ ի՞նչ կա թաքնված։

- Իրականում այդ արտահայտությունը ծիծաղելի է։ Անհասկանալի է, թե ինչու են այդպես ասում, մինչ այդ էլ հայտարարում էին, որ 7-10 օր հավես չկա այս ամենով զբաղվելու։ Սա խոսում է այն մասին, որ նույնիսկ քաղաքական միտք չունեն։ Մեզ համար բոլոր ամիսներն էլ լավն են։ Իրենք պետք է մտածեն, թե ինչպես են անելու, որ էլ ավելի վարկաբեկված դուրս չգան այս ամեն ինչի միջից։

- Շարժման մասնակիցները հենց սկզբից չեն թաքցրել, որ գործում են Մայր Աթոռի օրհնությամբ։ Վազգեն Գալստանյանը և Միքայել Աջապահյանը հայտարարել են, որ եթե կաթողիկոսը օրհնի, պատրաստ են առաջադրվել վարչապետի թեկնածու: Ինչ եք կարծում՝ մայիսի 26-ին կաթողիկոսին կտեսնե՞նք հրապարակում, կամ Գալաստանյանի թիկունքում կանգնած ուժերի գլխավոր ներկայացուցիչներին, դիցուք՝ Ռոբերտ Քոչարյանին, Սերժ Սարգսյանին։

- Գալստանյանի խոսքով՝ հրապարակում կարող ենք տեսնել նաև Տեր Աստծուն, եթե այլ գործող անձինք էլ տեսնենք, միևնույն է, ոչինչ չի փոխվելու, նրանք փաստացի չեն թաքցնում իրենց ակտիվ գործունեությունը շարժմանը։ Գրքի կազմն է փոխվել, բայց այն բովանդակազուրկ է մնացել։ Մի բան հստակ է. Հայաստանում չի կարող լինել կղերապետություն, դա ոչ միայն մենք չենք թույլ տա, այլ նաև՝ ՀՀ ժողովուրդը։ Չենք կարող կառավարվել եկեղեցականների կողմից, որոնք մնացել են դեռևս միջնադարում և պետությունից հողեր ու կալվածքներ են պահանջում։ Պետությունը չի ընկրկելու եկեղեցականների և եկեղեցապետության ցանկության դեմ։

- Վազգեն Գալստանյանը ավելի վաղ հանդիպել էր ԼՂ նախկին պատգամավորների, պաշտոնատար անձանց հետ։ Ըստ Ձեզ՝ ինչի՞ն են միտված այս հանդիպումները։

- Հանդիպումների շարքը նոր չէ, սակայն խոսում է այն մասին, որ հրապարակային ասելիք չունենալով՝ փորձում են տարբեր խմբերի մոբիլիզացնել։ Միևնույն է, եթե դու քո անելիքի վերաբերյալ ասելիք չունես քաղաքացիներին, կարող ես հանդիպել ում հետ որ ցանկանում ես։ ԼՂ մեր հայրենակիցները, հաշվի առնելով իրենց զգացմունքային իրավիճակը, տրվել են այդ ստին ու կեղծիքին և մասնակցել նրանց հավաքներին։ Արտահայտություններ է անում՝ «Ոսկեպարով դեպի Արցախ», ինչը նման է «Կարսով Էրզրում գնալուն», բայց դրանից հետո գիտենք, թե ինչ է եղել։ Քաղաքացիները նման սադրանքներին տրվելուց առաջ պետք է ՀՀ-ն վեր դասեն այլ դատարկ խոստումներից։

- Այս անգամ էլ ձախողելու դեպքում հետագայում՝ մինչև ընտրությունները, կրկին կփորձե՞ն փողոց դուրս գալ:

- Չենք կարող ասել ապագա պլանների մասին, բայց ժողովրդի համար պետք է պարզ լինի, որ սա Հայաստանի պետականության դեմ ուղղված պայքար է, իշխանությանը ոչ Սահմանադրական եղանակով տիրանալու պայքար, և մենք պետք է պաշտպանենք մեր քաղաքացիների այն իրավունքը, ըստ որի՝ ազատ ընտրություններով կձևավորվի իշխանություն։

Մերի Խաչատրյան