Բանդան կհեռացվի, կեղտոտ համակարգի վերջը կտան. Շանթ Ոսկերչյան

«Հայկական վերածնունդ» համահայկական կազմակերպության Փարիզի մասնաճյուղի համակարգող, «Հիմնադիր խորհրդարանի» պատգամավոր  Շանթ Ոսկերչյանը, որին այս մայիսին «Զվարթնոց» օդանավակայանից հետ ուղարկեցին Ֆրանսիա՝ թույլ չտալով մուտք գործել Հայաստան, երեկ մեր զրույցում կոշտ գնահատականներ է տվել ՀՀ իշխանություններին եւ ՕԵԿ-ին: Նա հայտարարել է, որ եթե ՕԵԿ-ը հույս ունի սուտ «Հայկական վերածնունդ» դառնալով խաբել ժողովրդին, սխալվում է:

«Սա ուզուրպացիա է, գողություն է: Եթե դրամից զատ նույնիսկ անուններ էլ գողացողները կարող են խաբել մեր ժողովրդին՝ ՕԵԿ-ը դարձնելով սուտ «Հայկական վերածնունդ», հուսով եմ, լրիվ սխալվում են: ՕԵԿ-ը, ինչպես նաեւ Դաշնակցությունը, Հայաստանի 3-րդ չընտրված նախագահի խամաճիկներն են: Ամեն ընտրությունից առաջ Սերժը սրանց առջեւ նետում է մի քանի ոսկոր, եւ իրենք գնում են իր համար «աշխատելու»: Բայց հուսով եմ, թե չեն գնալու մինչեւ 2017-ի ընտրություններ: Ե՛վ Սահմանադրության, ե՛ւ էլեկտրական ալիքի հետ Սերժը եւ իր կեղտոտ բանդան կհեռացվին հայկական քաղաքական կյանքից մեկընդմիշտ»,- ասել է Ոսկերչյանը:  

- Պարոն Ոսկերչյան, տեղեկություն կա, որ ՕԵԿ-ը պատրաստվում է 2017-ի ԱԺ ընտրություններին մասնակցել այլ անունով՝ Արթուր Բաղդասարյանի ստեղծած նոր միավորով, որը կրում է ձեր կազմակերպության անունը՝ «Հայկական վերածնունդ»: Դուք բավական կոշտ հայտարարություն էիք տարածել այս կապակցությամբ, հնարավո՞ր է դատի տաք նրանց: 

- Մեր այսօրվա տվյալներով, ցավոք, չի կարելի, քանի նույն երկրի մեջ չենք: Բայց վստահ, նոր մի հայտարարություն կանենք դարձյալ:

- Ի՞նչ եք կարծում, ինչո՞ւ է հենց այս անունը ընտրվել:

- Շատ գեղեցիկ եւ ականջին լավ հնչող անուն է: Իրենք նաեւ ուզում են շփոթ ստեղծել հանրության մեջ մեր «Վերածնունդի» եւ իրենց կեղծ «Վերածնունդի» միջեւ:

- Կարծում եք` կհաջողվի՞:

- Եթե Հայաստանի ժողովուրդը լավատեղյակ է մեր գործունեությունից, որ մենք աջակցում ենք ՀԽ-ին եւ հենց հիմա տեղի ունեցող կոնսոլիդացիային, իհարկե` ոչ:

- Բայց իրենք էլ են դեմ սահմանադրական փոփոխություններին, իսկ Արթուր Բաղդասարյանն արդեն խիստ ընդդիմադիր հայտարարություններով է հանդես գալիս:

- Այո, բայց գիտենք, ինքը եւ իր ՕԵԿ-ը մաս է կազմել մարտի 1-ի դեպքերին, օրումեջ շատ հանգիստ շապիկը փոխող կուսակցություն է: Հո մեր ժողովուրդը այդքան հիմար չէ՞, որ անվանափոխության հավատա մի անգամ եւս: Պետք է ժողովրդին իրազեկել:

- Երբ ձեզ արտաքսեցին ՀՀ-ից, ասել էիք, որ դիմելու եք ԵԴ եւ Ֆրանսիայի պատկան մարմիններին, այդ հարցով նորություն կա՞:

- Այո, թե՛ ՀՀ-ում, թե՛ այստեղ իմ փաստաբանները դեմել են: ՀՀ-ից Ֆրանսիայի ԱԳՆ-ին պատասխանել են, որ իբր իմ ժամանակավոր կեցության քարտի ժամկետը անցել էր: Բայց Ֆրանսիայի անձնագիրը լիուլի հերիք է ՀՀ մտնելու համար:  Ֆրանսիայի ԱԳՆ-ի պատասխանը մեզ չբավարարեց, պիտի գնանք մինչեւ վարչապետ, նախագահ, այս գործը ես թողնելիք չեմ: Հայ համայնքի ներկայացուցիչները նամակ էին փոխանցել ՀՀ 3-րդ չընտրված նախագահին, որ ՀՀ-ի միջազգային վատ համբավը այս պարագայում ավելի պիտի վատանա, որ որոշումը վերանայի: ՀՀ-ում իմ իրավունքները պաշտպանում է Արթուր Սաքունցը: Օմբուդսմենն էլ զբաղվեց, բայց նա իմ հարցը փակել է, ԱԱԾ-ից նրան ասել են, որ իմ անձը սպառնում է ՀՀ անվտանգությանը: Երբ հարցրել է՝ ինչու, ասել են, որ պետական գաղտնիք է: Սաքունցը շարունակում է, եւ եթե ուշքի չգան, ես գնալու եմ ԵԴ: Միջազգային մամուլին էլ ենք դիմելու, մեր գաղութներին:

- Ի՞նչ պետական գաղտնիքի մասին է խոսքը:

- Անհեթեթության գագաթնակետն է, ես որեւէ կերպ ՀՀ անվտանգությանը չեմ սպառնում, ընդհակառակը, 25 տարի երկիրը ղեկավարող չընտրված իշխանությունները եւ իրենց ԱԱԾ ղեկավարներն են ՀՀ անվտանգությանը սպառնացողները, որոնց վարած քաղաքականության պատճառով ՀՀ-ից 2 մլն մարդ է արտագաղթել: Ինձ համարում եմ քաղհալածյալ: Մենք հավատում ենք ՀԽ-ին, աջակցում եւ հուսով ենք, որ կոնսոլիդացիա կազմակերպելով, ժամ առաջ այս կեղտոտ համակարգի վերջը կտան եւ սրանք մեկընդմիշտ կկորչեն հայկական քաղաքական դաշտից: Վստահ եմ, որ իմ ընկերները պիտի հաջողեն:

- Ե՞րբ:

- Կարծում եմ, մոտ է գարունը, պարզապես ժողովուրդը պետք է ոտքի կանգնի, ճանապարհներից մեկը անհնազանդությունն է, պետք չէ վճարել հարկերը, կոմունալները, մինչեւ սրանք գնան: Չեմ կարծում, որ մինչեւ 2017-ի ընտրությունները համբերելու տեղ ունենան, հուսով եմ, ժամ առաջ գնալու են աղբանոց: Ցավոք, իշխանությունը տականքներով լեցուն է: Ռեժիմը պետք է փոխվի, միայն այդ ճանապարհով ՀՀ-ն կարող է ուշքի գալ: Եթե 25 տարվա ընթացքում ժողովրդի մասին մտածող ղեկավարներ լինեին եւ չխաբեին, բոլոր սփյուռքահայերը, որոնք ուզում էին ներդրում անել, մի մասը արեցին, մի մասը, ով չէր ուզում Սաշիկին 50 տոկոս փող վճարել, նրանց գործը խափանվեց, եթե լավ մարդ լինեին մեր ղեկավարները, հավաստիացնում եմ, 25 տարվա ընթացքում Հայաստանը Ֆրանսիայից լավ կլիներ եւ ներգաղթ կլիներ: