Ով է Ժիրայր Սեֆիլյանի դեմ ցուցմունք տված անձը

«Նոր Հայաստան» հանրային փրկության ճակատի առաջնորդ Ժիրայր Սեֆիլյանի գործով կալանավորված Հովհաննես Պետրոսյանը պաշտպանական ռազմավարություն է ընտրել, որի մասին դեռ չի բարձրաձայնում:

Սեֆիլյանի պաշտպանների խոսքով՝ Հովհաննես Պետրոսյանը ցուցմունք է տվել Սեֆիլյանի դեմ: Նրա եւ Սեֆիլյանի մասնակցությամբ առերես հարցաքննություն է տեղի ունեցել:

Այսօր մեզ հաջողվեց զրուցել Պետրոսյանի պաշտպան Արսեն Մկրտչյանի հետ: Նա տեղեկացրեց, որ Պետրոսյանին մեղադրանք է առաջադվել ՀՀ քրեական օրենսգրքի 235 հոդվածի 1-ին մասով (Ապօրինի կերպով զենք, ռազմամթերք, պայթուցիկ նյութեր ձեռք բերելը, իրացնելը, պահելը, փոխադրելը կամ կրելը՝ որոնք կատարվել են մի խումբ անձանց կողմից նախնական համաձայնությամբ): Հովհաննես Պետրոսյանի պաշտպան Արսեն Մկրտչյանը պատասխանեց սույն քրեական գործի վերաբերյալ մեր մի քանի հարցերին:

-Պարոն Մկրտչյան,  ձեր պաշտպանյալն ի՞նչ դիրքորոշում է հայտնել առաջադրված մեղադրանքի վերաբերյալ, ընդունո՞ւմ  է այն, թե ոչ:

-Այս փուլում չեմ կարող նմանատիպ հարցերին պատասխանել՝ ընդունում է, թե ոչ: Հովհաննես Պետրոսյանը հարցաքննվել է մինչեւ իմ գործին մասնակից դառնալը որպես կասկածյալ, հետագայում՝ որպես մեղադրյալ:

-Մեղադրանքը ընդունո՞ւմ է, թե ոչ նախաքննական գաղտնի՞ք է:

-Մինչեւ գործին մասնակից լինելը, ինքն ինքնուրույն է որոշել իր ռազմավարությունը, նա ընտրել է մի քիչ այլ պաշտպանական ռազմավարություն, որի մասին կցանկանայի հիմա չխոսել: Ես ձեր հարցի ենթատեքստը հասկանում եմ. որոշ անձինք փորձում են այնպես ներկայացնել, թե կալանավորված անձանց մեջ կան մարդիկ որոնք ընդունում են մեղադրանքը, կամ իրենց կալանավորվելուց հետո կալանավորվեցին մյուսները: Հորդորում եմ, որ մարդիկ զբաղվեն իրենց գործով: Ամենակարեւորն ասեմ, որ Հովհաննես Պետրոսյանը առաջինը չի եղել, որը ձերբակալվել է: Թե իմ պաշտպանյալը ի՞նչ գործեր է բռնել, ի՞նչ ցուցմունքներ է տվել, ես չեմ կարող քննարկել:

-Գործով կալանավորված Ժիրայր Սեֆիլյանի պաշտպանների խոսքով, Հովհաննես Պետրոսյանը ցուցմունք է տվել նրա դեմ: Սրա մասին ի՞նչ կասեք:

-Լավ կլիներ որ պարոն Սեֆիլյանի պաշտպանները զբաղվեին պարոն Սեֆիլյանի պաշտպանությամբ, երբ որ մարդիկ զբաղված են մի անձի պաշտպանությունով չփորձեն վարկաբեկել մյուս անձին:

- Այսինքն՝ ձեր պաշտպանյալը Սեֆիլյանի դեմ ցուցմունք չի՞ տվել

-Ես ընդամենը հրաժարվեցի պատասխանել այդ հարցին: Նախաքննության փուլում ով ինչ ցուցմունքներ է տվել դրա մասին ես ձեզ տեղեկություն հայտնելու իրավունք չունեմ:

-Պարոն Մկրտչյան, ձեր պաշտպանյալի նկատմամբ ճնշումներ գործադրվե՞լ են:

-Ճիշտն ասած չեմ կարծում, համենայնդեպս, ինձ նման փաստեր հայտնի չեն: Երբ ես մեկուսարանում այցելել եմ իմ պաշտպանյալին մարմնի վրա հետքեր չեմ նկատել: Հովհաննես Պետրոսյանը նման բաների մասին չի խոսել:

-Իսկ ձեզ հայտնի է, թե Սեֆիլյանն ու Պետրոսյանը ի՞նչ հարաբերությունների մեջ են եղել:

-Ամենակարեւորն այն է որ նրանք այսօր նույն քրեական գործի շրջանակներում են կալանավորված, իսկ թե նրանց հարաբերությունները ինչ են եղել, ոնց են եղել դա նախաքննության մարմնի պարզելու խնդիրն է: Իհարկե, նա ինձ ասել է՝ ճանաչել է Սեֆիլյանին, թե ոչ, բայց ես ձեզ դրա մասին չեմ ասի:

-Ձեր պաշտպանյալի մոտից զենք հայտնաբերվե՞լ է:

-Կալանավորման պահին իր մոտ զենք չի եղել:

-Իսկ բնակարանի խուզարկությա՞մբ:

-Ոչ էլ խուզարկությամբ:

-Այդ դեպքում չի հասկացվում, այդ մասով մեղադրանքը նշանակում է չի ընդունո՞ւմ:

-Ես այդ հարցին պատասխանում եմ, որ չեմ պատասխանում:

-Իսկ ինչո՞վ է զբաղվել Հովհաննես Պետրոսյանը մինչ կալանավորումը:

-Իմ պաշտպանյալը շատ տաղանդավոր նկարիչ է, աշխատել է ապակու արտադրամասում: Ամուսնացած է, ունի մեկ փոքր երեխա: Հայրը մահացած է, մայրն աշխատում է հացի փռում:

-Ո՞ր քրեակատարողական հիմնարկում է պահվում:

-«Նուբարաշեն» ՔԿՀ:

Նշենք, որ այս գործով մեղադրանք է առաջադրվել 9 անձի:

Սեֆիլյանն ընդդեմ «Արմենիա TV»-ի

Սեֆիլյանն ընդդեմ «Արմենիա TV» -ի քաղաքացիական հայց է ներկայացրել՝ հեռուստաընկերությունից պահանջելով իր վերաբերյալ տարածված կեղծ տեղեկությունները հերքել, ինչպես նաեւ իրենից հրապարակային ներողություն խնդրել: Այս մասին այսօր լրագրողների հետ հանդիպման ժամանակ հայտնեցին Սեֆիլյանի ներկայացուցիչիչներ Վարուժան Ավետիսյանը եւ Տիգրան Հայրապետյանը:

Սեֆիլյանի ձերբակալությունից օրեր առաջ՝ հուլիսի 12-ին «Արմենիա TV-ի «Սուր անկյուն» հաղորդման շրջանակներում ցուցադրվել է մի տեսանյութ, որում ասվում է, թե Սեֆիլյանն արցախյան ազատամարտի տարիներին, լինելով հրամանատար, մարտի դաշտում է թողել վիրավոր զինվորներից մեկին ու որոշում կայացրել այնտեղ եղած երկու ձիերից մեկը՝ նստելով՝ հեռանալ: Ըստ տեսանյութի՝ մարտի դաշտում թողնված վիրավոր զինվորը մահացել է:

Ըստ Սեֆիլյանի ներկայացուցիչների՝ասվածը չի համապատասխանում իրականությանը եւ արատավորում է ազատամարտիկի պատիվն, արժանապատվությունն ու գործարար համբավը:

Փաստաբան Տիգրան Հայրապետյանը նշեց, որ տեսանյութում նկարագրվող մարտական գործողությունների ժամանակ Սեֆիլյանն ինքն է ծանր մարմնական վնասվածքներ ստացած եղել եւ անգամ ցանկության դեպքում չէր կարող ձի վարելով՝ հեռանալ մարտի դաշտից: Հայրապետյանի խոսքով՝ Սեֆիլյանին, այլ վիրավորների հետ տեղափոխել են հոսպիտալ եւ նա միայն ժամեր անց է իմացել մարտադաշտում մնացած զինվորի մասին՝ տեղեկանալով նաեւ որ զինվորի զինակից ընկերները կարծել են, թե նա ի սկզբանե մահացած է եղել:

Սեֆիլյանը հերքման պահանջով դիմել է «Արմեինա»-ին, սակայն դիմումն անպատասխան է մնացել, որից հետո է, որ նա օրենքով սահմանված կարգով դիմել է դատարան:

Տիգրան Հայրապետյանը պնդում է, որ «Արմենիա հեռուստաընկերությունը, որի բաժնետոմսերի 2/3-ն, ըստ տարածված տեղեկությունների պատկանում են Սերժ Սարգսյանի փեսային, միտումնավոր է եթեր հեռարձակել տեսանյութը՝ նպատակ ունենալով զրպարտել Ժիրայր Սեֆիլյանին: Սույն գործը կքննի Աջափնյակ եւ Դավիթաշեն վարչական շրջանների ընդհանուր իրավասության դատարանը: