Ժոզե Մոուրինյոն Հենրիխ Մխիթարյանին առաջիկայում խաղալու շանսեր կտա

Ֆուտբոլի Եվրոպա լիգայի խաղարկության խմբային փուլում այսօր կայանալու են 2-րդ տուրի հանդիպումները. Հենրիխ Մխիթարյանի «Մանչեսթեր Յունայթեդը» սեփական հարկի տակ հյուրընկալելու է ուկրաինական «Զարյային»: Անգլիական մամուլում հնչող տեղեկությունների համաձայն՝ Մխիթարյանը մասնակցելու է «Զարյայի» հետ հանդիպմանը, թեեւ գլխավոր մարզիչ Ժոզե Մոուրինյոն շաբաթ օրը Անգլիայի առաջնության «Լեսթերի» հետ կայացած խաղից հետո հայ ֆուտբոլիստի բացակայությունը հայտացուցակում բացատրել էր վատ մարզավիճակով, երեկ էլ կայացած մամուլի ասուլիսում ուղղակի հայտարարել է՝ «Զարյայի» դեմ Մխիթարյանը չի խաղալու:

Հիշեցնեմ, որ օգոստոսի 31-ին Հայաստանի ազգային հավաքականի կազմում հանդես գալով Չեխիայի դեմ, Մխիթարյանը վնասվածք էր ստացել, որից հետո բաց թողեց մի քանի խաղ եւ վերադարձավ 10 օր հետո՝ «Յունայթեդի» կազմում մասնակցեց «Մանչեսթեր Սիթիի» դեմ խաղին: Չափազանց անհաջող առաջին խաղակեսից հետո Մխիթարյանը փոխարինվեց, որից հետո անգլիական թիմը տեղեկացրեց, որ Մխիթարյանի վնասվածքը կրկնվել է եւ մինչ այսօր հայ ֆուտբոլիստը այլեւս չի հայտնվել «Յունայթեդի» կազմում: Այս ընթացքում «Յունայթեդը» անցկացրեց 4 հանդիպում. արձանագրվեց 2-ական հաղթանակ եւ պարտություն:

Մինչեւ անցյալ շաբաթվա սկիզբը Մխիթարյանը ապաքինվում էր, ապա սկսեց մարզվել առանձին, իսկ սեպտեմբերի 24-ին «Լեսթերի» դեմ խաղից առաջ հասցրեց մի քանի մարզումներ անցկացնել ընդհանուր խմբում, որը, սակայն, բավարար չեղավ անգամ հայտացուցակում հայտնվելու համար: Այս շաբաթ Մխիթարյանը մարզվել է ամբողջ ծանրաբեռնվածությամբ եւ շանսեր կային, որ հենց «Զարյայի» հետ խաղում կվերադառնա խաղադաշտ: Առավել եւս, որ «Յունայթեդի» ֆեյսբուքյան էջն էլ, անդրադառնալով այսօր կայանալիք հանդիպմանը, տեղեկացրել էր, որ Մխիթարյանը Ուկրաինայում հանդես գալու տարիներին 3 անգամ խաղացել է «Զարյայի» դեմ եւ դարձել 4 գոլերի հեղինակ: Բայց Մոուրինյոյի մտքերն անընթեռնելի են, կայացած որոշումները՝ անկանխատեսելի:

Ամեն դեպքում՝ անկախ այսօր կայանալիք խաղից, բոլորին  է հետաքրքրում, թե ինչ ապագա է ունենալու Մխիթարյանը «Յունայթեդում»: Մրցաշրջանը չափազանց անհաջող սկսած հայ ֆուտբոլիստի ներկան եւ ապագան հետաքրքրում են ոչ միայն հայ ֆուտբոլասերներին, այլ նաեւ «Յունայթեդի» բոլոր երկրպագուներին: Անգլիական մամուլում Մխիթարյանի վերաբերյալ գրեթե բոլոր նյութերն սկսվում եւ ավարտվում են նույն հարցով՝ անցյալ խաղաշրջանի Գերմանիայի առաջնության լավագույն ֆուտբոլիստը ինչու չի կարողանում ցուցադրել իր ունակությունները Անգլիայում: Պատճառները, վարկածները շատ են՝ վնասվածք, վատ մարզավիճակ, «Յունայթեդի» գլխավոր մարզիչ Ժոզե Մոուրինյո, նոր թիմ եւ նոր երկիր եւ այլն:

Իհարկե, անգլիական մամուլի եւ ֆուտբոլասերների համար Մխիթարյանը դեռ «բազմաթիվ հարցականներով» ֆուտբոլիստ է՝ «անհայտ» հետխորհրդային երկրի սանը մի քանի տարում մեծ հեղինակություն նվաճեց Ուկրաինայում, ապա՝ Գերմանիայում, Եվրոպայում ընդհանրապես եւ բավական մեծ տրանսֆերային արժեքով այս տարի հայտնվեց «Յունայթեդում»: Չափազանց բծախնդիր, ամենաաննշան թվացող գործոնների վրա մեծ ուշադրություն դարձնող անգլիացի լրագրողներն անգամ առայժմ չեն կարողանում լիովին պարզաբանել Մխիթարյանի «հանելուկը»՝ ինչո՞ւ չի ստացվում հայ ֆուտբոլիստի խաղը «Յունայթեդի» կազմում:

Այս հարցի պատասխանը շատ ավելի պարզ է հայ ֆուտբոլասերներին: Իհարկե, բոլոր այն գործոնները, որոնք նշում են անգլիացի լրագրողները՝ վնասվածք, վատ մարզավիճակ, «Յունայթեդի» գլխավոր մարզիչ Ժոզե Մոուրինյո, նոր թիմ եւ նոր երկիր՝ այս բոլորը համատեղ հանդիսանում են հայ ֆուտբոլիստի անհաջող խաղերի պատճառը, բայց գլխավորը միայն Հենոյին հատուկ մի «երեւույթ» է՝ առաջին խաղաշրջանի «բարդույթը»: Ուկրաինական «Շախտյորում» եւ Դորտմունդի «Բորուսիայում» անցկացրած առաջին խաղաշրջանները մեծ հաշվով այնքան էլ չեն տարբերվում այն իրավիճակից, որը կա հիմա «Յունայթեդում»: Ընդ որում, այն տարիներին «Շախտյորի» եւ «Բորուսիայի» գլխավոր մարզիչներ Միրչա Լուչեսկուի եւ Յուրգեն Կլոպի մասին հայ ֆուտբոլասերները «արտահայտվում էին» գրեթե նույն խոսքերով, տոնայնությամբ, ինչ հիմա Մոուրինյոյի վերաբերյալ:

Իր նախկին 2 թիմերում էլ Հենոն սկսել է խաղալ «վնասվածքներով», «վատ մարզավիճակներով»՝ սրանք եղել են ավելի շատ հոգեբանական, նյարդային «խնդիրներ»: Հետեւաբար, «վնասվածք», «մարզիչ», «նոր թիմ, նոր երկիր», «վատ մարզավիճակ» բացատրությունները երկրորդական են Մխիթարյանի պարագայում: «Շախտյորում» եւ «Բորուսիայում» Մխիթարյանը տեղը հիմնական կազմում վաստակեց բացառապես իր աշխատանքով, հետագայում էլ դարձավ այդ թիմերի առանցքային ֆուտբոլիստ, մարզիչների «աչքի լույս»: «Մանչեսթեր Յունայթեդում» Մխիթարյանը գտնվում է շատ ավելի բարենպաստ իրավիճակում՝ ունի որոշակի անուն եւ համբավ: Մնում է միայն օր ու գիշեր աշխատել՝ մարզվել, ապացուցել իր անհրաժեշտությունը: Իսկ որ Հենոն կաշխատի, կմարզվի անմնացորդ՝ կասկած չի հարուցում: «Մանչեսթեր Յունայթեդը» եւ Ժոզե Մոուրինիյոն Հենրիխ Մխիթարյանին շանս, եթե հարկ լինի՝ շանսեր դեռ կտան սպասելիքները արդարացնելու համար:

Տպել
2110 դիտում

Քոչարյանին կալանքի տակ պահելու ժամկետը երկարացնելու մասին դատարանի որոշումը դեռևս չի տրամադրվել պաշտպաններին

Թալանել են Երեւանում քաղաքապետարանի ճարտարապետի տունը. գողոնը կազմում է մի քանի միլիոն դրամ

Վերահսկողական ծառայության նախկին աշխատակիցը պատրաստ է միլիոնավոր դոլարների չարաշահումների փաստեր ներկայացնել վարչապետին

«Արմավիր» ՔԿՀ-ի դատապարտյալին հայտնաբերել են մահացած

Ինչ թույլատրելի չէր Սերժ Սարգսյանի համար, չի կարող թույլատրելի լինել Նիկոլ Փաշինյանի համար. Սամսոնյան

Վեց-յոթ ամսվա աշխատողները չէին կարող այդքան բարձր դրույքաչափերով պարգեւավճարներ ստանալ. ԼՀԿ

Ավազակային հարձակում Երեւանում. կրկին թալանել են Varks.am-ի գրասենյակը

Դատարանում քիչ առաջ մեկնարկեց Սեդրակ Քոչարյանի հայցն ընդդեմ ԱԱԾ տնօրեն Արթուր Վանեցյանի գործով նիստը

Ոստիկանությունն ու ԱԱԾ-ն չպետք է վերածվեն նախարարությունների. Լիլիթ Մակունց

Մարզպետները գործել են օրենքով սահմանված կարգով. Մակունցը՝ մարզպետների՝ իրենց պարգեւատրման մասին

Ինչո՞ւ պետք է ոստիկանությունը պահել կառավարության կազմում, ԱԱԾ-ն տալ վարչապետին. Պետրոսյան

Ի՞նչ կարծիք ունեն մարզպետները մարզպետարանների օպտիմալացման մասին

Մարզպետների աշխատանքի մեկ տարին չի լրացել, կասկածելի է պարգեւատրման հիմքը. պատգամավոր

Ինչպե՞ս է ՀՀ-ն կատարում ՄԻԵԴ-ի վճիռը. ՄԻՊ-ը ԵԽ նախարարների կոմիտե հատուկ դիրքորոշում է ներկայացրել

«Արսենալը» շնորհավորել է Մխիթարյանի ծննդյան օրը

«Նաիրի Ինշուրանս ապահովագրական»-ը պետությանը պատճառել է մոտ 200 մլն դրամի վնաս. ՊԵԿ-ի բացահայտումը

Իննա Խոջամիրյանն ու Հայկ Պետրոսյանը նշանադրվել են

Մետաղական հանքավայրեր շահագործող ընկերությունների հրապարակային հաշվետվությունները բացակայու՞մ են․ ՀԲՃ

Երևան-Թբիլիսի երթուղու մրցույթում շահած տնտեսվարողը այն չի սպասարկել. գործը ՏՄՊՊՀ վարույթում է

Գորիս-Սիսիան և Դիլիջան-Վանաձոր ավտոճանապարհներին տեղ-տեղ մերկասառույց է