46 ոստիկանի «հարվածած» Հայկը գիտական աշխատանքների հեղինակ է

Ոստիկանության ՊՊԾ գնդի գրավմանը հաջորդած օրերին ոստիկանների եւ քաղաքացիների միջեւ հուլիսի 20-ին Խորենացի փողոցում տեղի ունեցած բախումների դեպքի առթիվ հարուցված քրեական գործից անջատված մասով դատական նիստը այսօր երկարատեւ ընդմիջումից հետո սկսվեց:

Ամբաստանյալի կարգավիճակում են 4 անձ՝ Հայկ Հովհաննիսյանը, Արման Մխիթարյանը, Նարեկ Սարգսյանը եւ Ալբերտ Ավագյանը: Բոլորն էլ գտնվում են կալանքի տակ:

Այսօրվա նիստի ընթացքում հայտնի դարձավ, որ ամբաստանյալներից Հայկ Հովհաննիսյանը 24 տարեկան է, սովորում է Հայաստանի պետական Ճարտարագիտական համալսարանի վերջին կուրսում: Մյուս ամբաստանյալը՝ 26-ամյա Արման Մխիթարյանը, նախկինում դատապարտված է եղել գողություն կատարելու համար, եւ պատժի կրումն ավարտվել է 5 ամիս առաջ: Այսինքն`Մխիթարյանը չի հասցրել երկար մնալ ազատության մեջ, քանի որ կալանավորվել է, այս անգամ` Խորենացի փողոցում տեղի ունեցած բախումների դեպքերով: Դատավորի հարցին ի պատասխան Մխիթարյանն ասաց, որ առողջական խնդիրներ ունի: Դատավորը հետաքրքրվեց, թե մասնավորապես՝ ինչպիսի՞: «Սիրտս է ահավոր ծակում եւ մեջքս է ցավում: Նոր է եղել»: Մխիթարյանն ասաց, որ դիմել է կալանավայրի բուժմաս. «էկան կպան մեջքիս՝ ասեցին բան չկա»: Մյուս ամբաստանյալ Ալբերտ Ավագյանը նշեց, որ կահույքագործ է, առողջական որոշակի խնդիրներ ունի: 

Ամբաստանյալներից Նարեկ Սարգսյանն էլ դատարանին հայտնեց որ ամուսնացած է, խնամքի տակ ունի 5 -ամյա երեխա: Մինչ կալանքի տակ գտնվելը մատուցող է աշխատել:

Նշենք, որ այս գործով տուժող է ճանչվել 46 ոստիկան, սակայն, թե ինչպես են նրանք տուժել, պաշտպանական կողմի համար դեռ անհայտ է: Այսօր 46 տուժողներից դատարան էր ներկայացել 15-ը:

Ամբաստանյալների պաշտպանները այսօր Կենտրոն եւ Նորք-Մարաշ վարչական շրջանների ընդհանուր իրավասության դատարանին միջնորդեցին փոխել իրենց պաշտպանյալների խափանման միջոց կալանքը: Մասնավորապես Հայկ Հովհաննիսյանի պաշտպան Աննա Ջուվանովան այսօր դատարանին միջնորդեց փոխել իր պաշտպանյալի նկատմամբ ընտրված խափանման միջոցը՝ վկայակոչելով վճռաբեկ դատարանի նախադեպային որոշումներն ու եվրոպական կոնվենցիայի դրույթները:

Ըստ պաշտպանի` գործի նախաքննության ընթացքում իր պաշտպանյալի դեմ որեւէ վկա ցուցմունք չի տվել: «Հայկը շուրջ 5 ամիս է` գտնվում է կալանքի տակ եւ զրկվել է դասերին հաճախելու հնարավորությունից »,- ասաց նա՝ նշելով, որ իր պաշտպանյալը դրական բնութագիր ունի, մի քանի գիտական աշխատանքների հեղինակ է:

Միջնորդության դեմ, սակայն, առարկեց մեղադրող դատախազ Հայկ Պետրոսյանը, ինչին ի պատասխան, դահլիճում ներկա ամբաստանյալի հայրը՝ Հովհաննես Հովհաննիսյանը, ծափահարեց: «Հրաշալի որոշում », - հեգնեց նա: Ինչի համար դատավոր Մեսրոպ Մակյանը նախազգուշացրեց, որ կրկնվելու դեպքում նրա նկատմամբ սանկցիա կկիրառի:

Խորհրդակցական սենյակից վերադառնալուց հետո դատավորը որոշում կայացրեց մերժել պաշտպանի միջնորդությունը:

Ամբաստանյալ Նարեկ Սահակյանի պաշտպան Արայիկ Պապիկյանը նույնպես նամանատիպ միջնորդություն ներկայացրեց՝ խնդրելով փոխել իր պաշտպանյալի խափանման միջոցը ստորագրությունից չհեռանալու մասին, կամ կիրառել այլընտրանքային խափանման միջոց գրավ: Պապիկյանը նշեց, որ Նարեկ Սարգսյանը նախաքննության ընթացքում խոչընդոտ չի ստեղծել, չի խուսափել քննչական գործողություններից: Նարեկ Սարգսյանն իր հերթին դիմելով դատարանին՝ ասաց. «Ես ունեմ ծանրակշիռ փաստեր, որոնք կապացուցեն իմ անմեղությունը, ուստի նիստերից խուսափելը կդիտվի որպես հիմարություն: Ես հանցագործ չեմ եւ չեմ ուզում մնալ բանտում»: 24-ամյա Նարեկ Սարգսյանը դատավորին հիշեցրեց, որ իր խնամքին է մանկահասակ որդին, կինը եւ վերջինիս վատառողջ ծնողը: «Կնոջս աշխատելու հնարավորությունները սահմանափակ են, ընտանիքիս միակ կերակրողն եմ: Որքան գտնվեմ անազատության մեջ, այնքան կծանրանա ընտանիքիս վիճակը, որն առանց այդ էլ ծանր է»,-հայտարարեց Սարգսյանը: Հիշեցնենք, որ նա մի քանի օր առաջ է դադարեցրել հացադուլը. հացադուլ սկսելու պատճառը կրկին վերաբերում էր իր խափանման միջոցը փոխելուն:

Այսօր դատարան նրան տեսակցելու էին եկել 5-այա որդին ու կինը, որոնք մոտ 5 ամիս չէին կարողանում տեսակցել նրան: Նարեկի կինը՝ Էմմա Սարգսյանը, մեր զրույցում ասաց, որ այժմ հայրիկի հետ են ապրում՝ ծանր սոցիալական պայմաններում. «Ընտանիքում միակ աշխատողը Նարեկն էր, տարբեր ռեստորաններում մատուցող էր աշխատում»,-ասաց նա: Խորենացի փողոցում տեղի ունեցած բախումներից նա տեղյակ չէր, տեղեկացել է միայն այն ժամանակ, երբ ոստիկանները գնացել են իրենց տուն եւ տեղեկացրել, որ ամուսինը ձերբակալված է: «Տղաս հարցնում ա Նարեկից, մենք էլ ասում ենք Երեւանում աշխատում ա»,- պատմեց ամբաստանյալի կինը:

Այսօր դատարանը մերժեց նաեւ ամբաստանյալ Ալբերտ Մարգարյանի խափանման միջոց կալանքը փոխելու պաշտպանի միջնորդությունը:

Նշենք, որ, համաձայն մեղադրական եզրակացության, Հայկ Հովհաննիսյանը 2016թ. հուլիսի 20-ին Երեւան քաղաքում տեղի ունեցած զանգվածային անկարգությունների ընթացքում բռնություն է գործադրել իրենց ծառայողական պարտականությունները կատարող ոստիկանների նկատմամբ, նրանց ուղղությամբ նետել քար, մետաղյա ձողին նմանվող իր եւ փայտի կտորներ:

Արման Մխիթարյանին մեղսագրվում է ոստիկանների վրա քարեր նետելը:

Նարեկ Սարգսյանը մեղադրվում է ձեռքերով, ոտքերով եւ մահակով ոստիկաններին հարվածներ հասցրելու մեջ:

Իսկ Ալբերտ Ավագյանն էլ մեղադրվում է ոտքերով ու ձեռքերով ոստիկաններին հարվածելուց զատ, նաեւ ոստիկանության աշխատակցի վահանը քաշելու եւ խլելու փորձի մեջ:

Այս գործով հաջորդ դատական նիստը տեղի կունենա նոյեմբերի 25-ին ժամը 15:00-ին: