Չե՞ն պահանջում «Սասունցի Դավիթ» էպոսում չօգտագործել այդ անունը. Ֆ. Հայրապետյանը՝ «Ծռեր»-ին

«Հնչեցվող հերյուրանքներին պատասխանելն իմ պատվից ցածր եմ համարում»,- մեզ հետ զրույցում այս մասին հայտարարեց «Սասնա ծռեր» հիմնադրամի հիմնադիր Ֆելիքս Հայրապետյանը՝ մեր խնդրանքով արձագանքելով «Սասնա ծռեր» խմբի անդամներից Մխիթար Ավետիսյանի, Պավել Մանուկյանի եւ Վարուժան Ավետիսյանի այսօր տարածված նամակ-հայտարարությանը:

Հիշեցնենք, տարածված հայտարարությամբ նշված անձինք ընդգծում էին, որ հիմնադրամի հոգաբարձուների խորհրդի որոշ անդամներ քաղաքական չեզոքություն չեն պահպանում եւ կատարում են «Սասնա ծռեր» խմբավորման ապստամբական-ազատագրական գաղափարը եւ գործողությունները մերժող քայլեր, ինչը հիմք է տալիս եզրակացնելու, որ հիմնադրամի նման գործունեությունն այլևս ոչ միայն նպատակահարմար չէ, այլև վնասակար է ազատագրական պայքարի համար:

«Ուստի, առաջնորդվելով Հայաստանի ազատագրման պայքարի գերակայություններով, ինչպես նաև նպատակ ունենալով կանխել նրա աջակիցների շրջանում հնարավոր պառակտումը, առաջարկում ենք սահմանափակվել կատարած աշխատանքով և դադարեցնել «Սասնա ծռեր» անվանմամբ հիմնադրամի գործունեությունը»,- ասվում էր հայտարարությունում:

Արձագանքելով հայտարարության այս վերջին հատվածին, որ վերաբերում է անվանմանը՝ Ֆելիքս Հայրապետյանը մեր զրույցում ասաց. «Իսկ մարդիկ չե՞ն պահանջում «Սասունցի Դավիթ» էպոսում նույնպես չօգտագործել այդ անունը»:

Անդրադառնալով մեր մյուս հարցերին, որոնք վերաբերում էին հիմնադրամի հոգաբարձուների խորհրդից Նանոր Սեֆիլյանի եւ Արմենակ Կյուրեղյանի հեռանալուն, Հայրապետյանն ընդգծեց, որ շուտով այդ հարցերին կլինի Հիմնադրամի պաշտոնական պատասխանը:

Հարցրինք նաեւ, թե ի՞նչ կապ ունի ԱԻՄ առաջնորդ Պարույր Հայրիկյանի հետ: Համացանցում քննարկումներ էին ընթանում, որ «Սասնա ծռեր» հիմնադրամը գովազդում է Հայրիկյանին: Այդ կապակցությամբ խոսք կար նաեւ «Ծռերի» այսօրվա հայտարարությունում: Նշվում էր, որ փորձ է արվել «Սասնա ծռեր» խմբավորման ճանաչումն ու հեղինակությունն օգտագործել նրա ծրագիրը չընդունող քաղաքական ուժի շահերը սպասարկելու համար: Այս կապակցությամբ Ֆելիքս հայրապետյանն ասաց. «Նա այնքանով կապ ունի, որ ինքը և Շահեն Հարությունյանը հայ դիսիդենտական, ազգայնական պայքարի առաջամարտիկներն են։ Իսկ Հայրիկյանը 17 տարի նաև քաղբանտարկյալ է եղել։ Այդքանը։ Ոչ ավել և ոչ պակաս։ Մեր հետ, ֆոնդի հետ՝ ոչ կազմակերպական, ոչ այլ կերպ կապված չի»։

Հիշեցնենք, որ «Սասնա ծռեր» հիմնադրամում լարվածությունը սկսվել էր վաղուց: Ըստ որոշ տեղեկությունների՝ հիմնադրամի որոշ անդամներ, որոնք հիմնականում Ֆելիքս Հայրապետյանի ընտանիքից են, ծաղրական ու թունոտ գրառումներով են հանդես եկել Ծռերի եւ նրանց գաղափարակից ընկերների մասին:

Սրան հաջորդեց «Սասնա ծռեր» խմբի անդամներ Արեգ եւ Սերգեյ Կյուրեղյանների հոր՝ Արմենակ Կյուրեղյանի եւ Հիմնադիր խորհրդարանի անդամ Ժիրայր Սեֆիլյանի կնոջ՝ Նանոր Սեֆիլյանի հեռացումը հոգաբարձուների խորհրդից:

Նշենք, որ հնչող քննադատություններին ֆեյսբուքյան գրառմամբ արձագանքել է հիմնադրամի հոգաբարձուների խորհրդի անդամներից Արուսյակ Հայրապետյանը՝ Ֆելիքս Հայրապետյանի դուստրը.

«Սասնա ծռերի» ընտանիքներից օգնություն է ստացել 43 հոգի (նկատի է առնված նաև կրկնակի ստացածները): Մյուս քաղբանտարկյալները՝ 8 հոգի։ Սրանք փաստեր են: Այս տվյալները ինչ որ բան ասո՞ւմ են։ Նաև՝ Մարտին Վարդանյանն ու Սարո Այվազյանը, հիմնադրամի մուծած գրավի շնորհիվ հիմա իրենց ընտանիքների հետ են:

Հիմնադրամը պաշտոնական քաղաքական ոչ մի հայտարարություն չի արել։ Հոգաբարձուներն ազատ մարդիկ են եւ ինչի մասին ասես կարող են խոսել, ինչպես դուք: Այս ամիսների ընթացքում, հարգելի քննադատողներ, ինքներդ ի՞նչ եք արել Սասնա ծռերի և նրանց ընտանիքների և բոլոր քաղբանտարկյալների, քաղհալածյալների և խղճի բանտարկյալների համար»,- գրել է նա:

Թե ինչ զարգացում կունենա այս լարվածությունը, դեռ դժվար է ասել, ամեն դեպքում ակնհայտ է, որ «Սասնա ծռերը» քաղբանտարկյալների ընտանիքներին կոչ են անում չօգտվել Հայրապետյանի բացած հիմնադրամի ծառայություններից՝ մինչեւ իրենք առաջարկեն պայքարի նյութական աջակցության նոր ձեւաչափեր: