Հակոբ Սերոբյան. Դոհայի աշխարհի գավաթի խաղարկությունից ունեցած սպասելիքներն արդարացան

Հայաստանի մարմնամարզության հավաքականի գլխավոր մարզիչ Հակոբ Սերոբյանը գոհ է Քաթարի մայրաքաղաք Դոհայում տեղի ունեցած աշխարհի գավաթի խաղարկության արդյունքներից: Մարտի 22-25-ը կայացած մրցաշարից Հայաստանի հավաքականը վերադարձել է 3 մեդալով: Արթուր Թովմասյանը չեմպիոն է դարձել օղակների վրա վարժությունում, իսկ Արթուր Դավթյանը արծաթե մեդալ է նվաճել հենացատկում եւ բրոնզ՝ նժույգթափերում: Armtimes.com-ի հետ զրույցում Սերոբյանն ամփոփեց մրցաշարը:    

«Ընդհանուր առմամբ՝ ես գոհ եմ արդյունքներից: Սպասելիքներն արդարացվեցին: Մեդալների քանակով մենք 2-րդ տեղն ենք զբաղեցնում, ետ ենք մնում միայն Չինաստանից, դա էլ է շատ լավ արդյունք»,- ասաց նա:

Սերոբյանը նաեւ առանձին-առանձին վերլուծեց մարզիկների ելույթները: Նա հատկապես գոհ է Արթուր Թովմասյանի կատարած աշխատանքից: Արթուրը վերջին անգամ միջազգային մրցաշարի էր մասնակցել 2016 թ. Շվեյցարիայում. ելույթ էր ունեցել Եվրոպայի առաջնությունում: Դրանից հետո վիրահատվեց եւ ապաքինվում էր ծնկի վնասվածքից: 1-ին մրցաշարը, որին նա վնասվածքից հետո մասնակցեց, այս տարի մարտին կայացած ՀՀ առաջնությունն էր, որտեղ գրավեց 2-րդ տեղը: Դոհայում հասցրեց շտկել թերությունները եւ առաջ անցնել մրցակիցներից:

«Արթուր Թովմասյանի արդյունքից չենք կարող գոհ չլինել: Մարզումների ժամանակ նա չէր կատարում այնպես, ինչպես պետք է աներ: Ուրախ եմ, որ մրցման ժամանակ վնասվածքից հետո նրա ամենալավ կատարումը տեսանք: Նա արժանիորեն վաստակեց իր առաջին տեղը»,- ասաց նա:

Եվրոպայի փոխչեմպիոն Արթուր Դավթյանը նույնպես շատ է ուրախացրել մարզչին: Նրա հետ կապված մարզիչները որոշ փորձարկումներ են արել: Եվրոպայի գալիք առաջնությունում Արթուրը պետք է հանդես գա բազմամարտում, այդ պատճառով էլ Դոհայում ուժերն է փորձել մի քանի վարժություններում եւ ըստ Սերոբյանի՝ իրեն հիանալի է դրսեւորել:

«Շատ գոհ եմ: Այն, որ եզրափակիչ դուրս եկավ ազատ վարժությունում 7-րդ տեղով, հետո եզրափակչում բարելավվեց, բարձրացավ 4-րդ տեղ՝ մոտեցավ մեդալին, դա մեզ համար անակնկալ էր: Նժույգթափերի վրա մեդալ նվաճելը նույնպես անակնկալ էր. մրցակցությունը շատ մեծ էր: Կարելի է ասել՝ Արթուրն ուղղեց Հարություն Մերդինյանի սխալը, որը եզրափակիչ դուրս չեկավ, եւ մեդալ նվաճեց: Հենացատկն Արթուրի ամենաուժեղ գործիքն է, բայց 2-րդ ցատկը 8 տասնորդականով քիչ կատարեցինք՝ հեշտ, ու, որ կարողացանք 2-րդ տեղը գրավել, դա էլ էր լավ արդյունք: Զուգափայտերում եզրափակիչ մտնելը.... արդեն ժպտում էինք: Մրցակիցները բարդ վարժություններ էին անում, լավ չէին կարողանում կատարել, իսկ Արթուրն իր ավելի դյուրին վարժությունը գերազանց կատարեց»,- ասաց Սերոբյանը:

Այս մրցաշարում Հայաստանի հավաքականն էին ներկայացնում նաեւ Եվրոպայի չեմպիոն, աշխարհի առաջնության բրոնզե մեդալակիր Հարություն Մերդինյանը եւ Եվրոպայի արծաթե մեդալակիր Վահագն Դավթյանը: Մեդալների ակնկալիքներ կային նաեւ նրանցից, սակայն ինչ-որ բան խանգարեց: Մերդինյանի դեպքում նախադաստակի վնասվածքն էր, որը նա ստացել է ձմռանը սառույցի վրա ընկնելու պատճառով: Մարզիկը չկարողացավ հաղթահարել որակավորման փուլը:

«Դե, վնասվածք ուներ, դա խանգարեց, ինքն ուներ այդ հնարավորությունը: Հայաստանի առաջնության ընթացքում էլ 1-ին օրն ընկավ նժույգթափերից, 2-րդ օրը կատարեց: Վնասվածքը զգացնել տվեց: Վնասվածքից հետո նա տրամադրվեց, որ պետք է գնա, պետք է անի վարժությունը, դա գոհացնում է: Խոստացել է, որ Եվրոպայի առաջնության ընթացքում անպայման կկատարի վարժությունը»,- ասաց նա:

Վահագն Դավթյանն էլ բարդ վարժություն էր պատրաստել Եվրոպայի առաջնությունից առաջ փորձարկելու համար: Որոշ թերություններ է ունեցել, որոնց պատճառով չի կարողացել մրցանակային տեղ զբաղեցնել: Ելույթներն ավարտել է 4-րդ տեղով:

«Վահագն Դավթյանի օղակները շատ բարդ էին: Նա կարող էր ավելի լավ արդյունք գրանցել, բայց վրիպումներ ունեցավ: Թեպետ թեթեւ սխալներ էին, բայց մեդալ չբերեց»,- ասաց նա:

Այս շրջանում մարմնամարզիկները նախապատրաստվում են Եվրոպայի առաջնությանը: Այն կայանալու է ապրիլի 19-23-ը Ռումինիայում: Հայաստանի հավաքականը մրցավայր է մեկնելու ապրիլի 14-ին: Մրցաշարին մասնակցելու են Հարություն Մերդինյանը, Վահագն Դավթյանը, Արթուր Դավթյանը, Արթուր Թովմասյանը, Վիգեն Խաչատրյանը եւ Արմեն Պետրոսյանը: