Առուշանյանը դաջվածքների հարցից խուսափում է, հիմա լուրջ քարոզարշավ է իրականացնում. ՖՈՏՈ

Նախորդ կառավարության նիստին Կարեն Կարապետյանի որոշմամբ` Գորիսի քաղաքապետի ժամանակավոր պաշտոնակատար նշանակվեց ՀՀԿ-ական Առուշ Առուշանյանը: Գործող քաղաքապետ Վաչագան Ադունցը սեփական դիմումի համաձայն`առողջական խնդիրների պատճառով հրաժարական տվեց: Նախկին քաղաքապետի այս պատճառաբանությանը զուգահեռ, սակայն շրջանառվեց տեղեկություն, որ Ադունցի հրաժարականը պարտադրված է եղել հանուն՝  ՀՀԿ-ի համար ընտրությունների ժամանակ 7 հազար ձայն ապահոված Առուշանյանի: Վերջինս ՀՀԿ ռեյտինգային ցուցակով 7000 քվե ստանալով՝ ընտրվել էր պատգամավոր, սակայն կուսակցական որոշմամբ հրաժարվեց մանդատից: 

Առուշանյանը խուսափում է լրատվամիջոցների հետ ուղիղ շփումից, մասնավորապես մեզ առաջարկեց ցանկացած հարց ուղարկել գրավոր:

Ստորեւ ներկայացնում ենք մեր հարցազրույցը Առուշ Առուշանյանի հետ:

 - Պարոն Առուշանյան, պատրաստվու՞մ եք Գորիսի քաղաքապետի առաջիկա ընտրություններում առաջադրել Ձեր թեկնածությունը:

 - Նոյեմբերի 5-ը առջևում է, իմ մասնակցության մասին ավելի ուշ կխոսեմ:

 - Ի՞նչ ծրագրեր ունեք, որը պատրաստվում եք իրականացնել այս ընթացքում եւ ընտրվելուց հետո:

 - Ընդամենը մի քանի օր է, ինչ ժամանակավոր պաշտոնակատար եմ նշանակվել, արդեն սկսվել են համայնքի բարեկարգման լայնածավալ աշխատանքներ: Սկսած քաղաքի մուտքն ազդարարող դարպասներից՝ համայնքի տարբեր հատվածներում, որտեղ տարիներով աշխատանք չի իրականացվել, բարեկարգման, կանաչապատման, ծաղկապատման աշխատանքներ են կատարվում, մաքրվում աղբից: Երեքշաբթի օրվանից, իմ սեփական նախաձեռնությամբ, Գորիսում հանրային տրանսպորտը կգործի անվճար: Գորիսը խոշորացված համայնք է, տարբեր աշխատանքներ ենք սկսում նաև բնակավայրերում: Խնդիրները շատ են, անելիքները՝ ևս: Մի քանի օրից դրական փոփոխությունները տեսանելի կլինեն:

 - Տեղեկություններն այն մասին, որ գորիսեցիները չեն վստահում իրենց խնդիրները ձեզ՝ ձեր երիտասարդ տարիքի պատճառով, ինչպե՞ս կմեկնաբանեք այս հանգամանքը (Առուշանյանը 26 տարեկան է):

 - ԱԺ ընտրություններին գորիսեցիներն արդեն ցույց են տվել, թե որքանով են ինձ վստահում: Շուրջ 7000 քվեն, որ ստացել եմ իմ համաքաղաքացիներից՝ այդ վստահության մասին են վկայում: Սա փաստ է:

 - Ի՞նչ եք կարծում, Ձեր երիտասարդ տարիքը թույլ կտա ղեկավարել Գորիսը:

 - Տարիների փորձը կարևոր է, բայց  երիտասարդ լինելը երբեք խոչընդոտ չի կարող հանդիսանալ, եթե կա կամք, ներուժ և պատասխանատվություն:

 - Ինչու՞ հրաժարվեցիք պատգամավորի Ձեր մանդատից:

 - Դա որոշում էր, որ կայացվել է իմ թիմի հետ միասին: Գորիսում տարիներ շարունակ մեր կողմից ներդրումներ են արվել՝ ուղղված համայնքի առաջնային խնդիրների լուծմանը: Այսօր էլ կան բազում  պրոբլեմներ, որոնց լուծումների տեսլականը մեր թիմն ունի: Այդ իսկ պատճառով՝ որոշում կայացվեց, որ ես մնում եմ  Գորիսում, և մենք  շարունակում ենք անհրաժեշտ ներդրումներն իրականացնել, և հետևողականորեն ջանքեր ներդնել ի նպաստ Գորիսի շենացմանը:

- Ճի՞շտ են տեղեկությունները, որ Ձեր մարմնի վրա կան դաջվածքներ:

- Այդ հարցին պատասխանել եմ մի քանի անգամ, որ այդ խոսակցություններն անհիմն են և ուղղորդված:

 - Ի՞նչ նպատակով եք այն արել: Արդյո՞ք ցանկանում եք դրանցից ազատվել:

Վերջին հարցին Առուշանյանը չի պատասխանել:

Այս օրերին խոսվում է, որ Առուշանյանը Գորիսում դրական փոփոխություններ է կատարում, սա թերեւս խոսում է այն մասին, որ նա ցանկություն ունի ժամանակավոր պաշտոնակատարից դառնալ քաղաքապետ: Առուշանյանի նշած բարեկարգման աշխատանքներն էլ, այդ թվում անվճար հասարակական տրանսպորտի շահագործումը խոսում է վաղաժամ քարոզարշավի սկսման մասին: Գորիսի քաղաքապետի ընտրությունը նոյեմբերի 5-ին է, հավանաբար Առուշ Առուշանյանը միակ թեկնածուն է լինելու: