«Այն ծառայությունները, որն անհրաժեշտ է քաղաքացուն ամենօրյա կյանքում, անվճար ենք դարձնում կամ նվազեցնում ենք դրույքաչափը»

ՀՀ Կառավարությունն այսօրվա նիստում հավանություն տվեց արդարադատության նախարարության՝ հանրային ծառայությունների մատուցմանն առնչվող օրենսդրական նախագծերի փաթեթին։ Մի շարք դեպքերում որոշում կայացվեց վերացնել վճարվող պետական տուրքը։ 

Նախատեսվում են փոփոխություններ, որոնք միտված են վարչարարության պարզեցմանը, մատուցվող ծառայությունների ժամկետի կրճատմանը, որակի բարձրացմանը, իրավական հիմք են ստեղծում հետագա թվայնացման աշխատանքների պարզեցման համար:

Հարցը զեկուցող արդարադատության նախարար Ռուստամ Բադասյանը տեղեկացրեց, որ առաջարկվում է սահմանել Քաղաքացիական կացության ակտերի գրանցման մարմինների նոր համակարգ front եւ back office ձեւաչափով:

«Դիմումները կընդունեն սպասարկման կենտրոնները, որոնք կարող են լինել գործող քաղաքացիական կացության ակտերի գրանցման գործակալության կենտրոնները, միասնական գրասենյակները, որոնց առաջին միասնական գրասենյակն արդեն գործում է»,- ասաց նախարարը՝ հավելելով, որ կարող են նաեւ դիմումներն ընդունել մասնավոր լիազոր օպերատորները, ինչպես նաեւ օտարերկրյա պետություններում հյուպատոսարանները:

Նախարարն ասաց, որ բոլոր պաշտոնական փաստաթղթերի դեպքում ապոստիլի տրամադրումը կիրականացնի մեկ պետական մարմին միասնական ընթացակարգով, այդ թվում՝ էլեկտրոնային ձեւաչափով: Ծառայությունը մեկ օրում կտրամադրվի: ԱԳՆ-ի հետ այդ հարցի վերաբերյալ որոշ քննարկումներ կլինեն։

Նրա խոսքով՝ էլեկտրոնային դիմումների ներկայացման կարգի սահմանումը նախարարի հրամանով հնարավորություն կտա քաղաքացիական կացության ակտերի գրանցման ծառայությունների մատուցումն իրականացնել նաեւ առցանց հարթակի միջոցով: Վերացվում է նաեւ 3000 դրամ պետական տուրքը առցանց անհատ ձեռնարկատեր հաշվառվելու համար։

Առեւտրային իրավաբանական անձ գրանցելու դեպքում պետական գրանցման նախընտրելի ժամկետ նշելու հնարավորություն է տրվում, ինչը, ըստ Բադասյանի, կվերացնի յուրաքանչյուր ամսվա որոշակի օրերին, հիմնականում՝ ամսվա վերջին եւ ամսվա սկզբին գործակալությունում առաջացող հերթերը: 

«Առեւտրային կազմակերպությունների ժամկետը կրճատվում է մեկ աշխատանքային օրով: Ներկայում երկու օր է, իսկ օրինակելի կանոնադրությամբ գրանցվելու դեպքում տեղում կնիքի, եւ աշխատողի գրանցման հայտի ներկայացման դեպքում ՀՀ-ի համար գործարարությամբ զբաղվելը կհեշտանա»,- նշեց նախարարը՝ հավելելով, որ անհատ ձեռնարկատերերին հաշվառվելու հնարավորություն կտրվի լիազորված անձի միջոցով: 

Առաջին անգամ հնարավորություն կա ՀՀ տարածքից դուրս հյուպատոսական հիմնարկների կողմից ինչպես մեր քաղաքացիների, այնպես էլ՝ օտարերկրյա քաղաքացիների համար Հայաստանում բիզնես հիմնադրել, կամ հայկական ընկերության մասնաբաժին գնել։ Նրա կարծիքով՝ դա ներդրումային միջավայրի բարելավմանն է միտված։

Բադասյանը հավելեց, որ վերացվել է օտարերկրյա պետության տված փաստաթղթերի, նոտարական կարգով հաստատված թարգմանությունների ներկայացումը, եւ դրանք կարող են ներկայացվել որակավորման վկայական ունեցող թարգմանչի ստորագրությամբ հաստատված հայերեն թարգմանությամբ: 

Կրճատվել են ամուսնության գրանցումների ժամկետները․ «Ներկայում գրանցումը կատարվում է դիմումը ներկայացնելուց հետո 10 օրից մինչեւ 3 ամիս: Նոր նախագծով սահմանել է դիմումը ներկայացնելու հաջորդ օրվանից մինչեւ 6 ամիս՝ իր նախընտրությամբ օրը»,- նշեց նա՝ հավելելով, որ ամուսնության համար վճարվող 1000 դրամ պետական տուրքը վերացվել է, եւ այն անվճար կտրամադրվի։ Նրա խոսքով՝ տարեկան 15 հազար ամուսնություն է գրանցվում ՀՀ-ում։

Միայնակ մայր լինելու դեպքում տեղեկանքի համար նախատեսված 2000 դրամ պետական տուրքը եւս կվերացվի։

«Միաժամանակ որոշ ծառայությունների դեպքում պետական տուրքի դրույքաչափերը ավելացնում ենք։ Բոլոր այն ծառայությունները, որ անհրաժեշտ են քաղաքացուն իր ամենօրյա կյանքում, կա՛մ անվճար ենք դարձնում, կա՛մ նվազեցնում ենք դրույքաչափերը, իսկ բոլոր այն ծառայությունները, որոնք առաջին անհրաժեշտության չեն, եւ հաճախ հենց անձի մեղքով է նորից դիմում ներկայացվում, այդտեղ որոշակի դրույքաչափերի բարձրացում ենք կատարում»,- ներկայացրեց նախարարը։