Ոմանց թվաց՝ կարող են օգտվել խառը քաղաքական վիճակից և փորձել «խաղեր տալ». Պոլիտեխնիկի ռեկտորի թեկնածուն դատարան է դիմել

Հայաստանի ազգային պոլիտեխնիկական համալսարանի ռեկտորի նշանակում մինչ օրս չի կատարվել: Հոգաբարձուների խորհրդի նախագահի կողմից կրթության, գիտության, մշակույթի եւ սպորտի նախարարությանը ուղարկված փաստաթղթերը դեռ ուսումնասիրվում են: Ռեկտորի ընտրությունների վերաբերյալ վերջնական որոշում եւս դեռ չկա՝ նոր մրցույթ կանցկացվի՞, թե՞` չէ: Եվ քանի դեռ նախարարությունն ուսումնասիրում է տեղի ունեցած գործընթացի իրավական կողմը, ռեկտորի նախկին թեկնածու Դավիթ Ղազարյանը ռեկտորի ընտրության արդյունքներն անվավեր ճանաչելու պահանջով հայց է ներկայացրել դատարան:

Հիշեցնենք, որ մարտի 15-ին Պոլիտեխնիկի հոգաբարձուների խորհրդի նիստում հայտարարվեց, թե 17 կողմ, 5 դեմ ձայնով ռեկտոր է ընտրվել պրոռեկտոր Գոռ Վարդանյանը, իսկ արձանագրությունը ստորագրվել է հաշվիչ հանձնաժողովի 5 անդամներից 3-ի կողմից: Ընտրությունից հետո, սակայն, պարզ դարձավ, որ քվեարկության արդյունքների արձանագրությունը ստորագրել է ոչ թե 3, այլ ընդամենը 2 անդամ: Մինչդեռ այն պետք է ստորագրվեր հաշվիչ հանձնաժողովի բոլոր անդամների կողմից: Հարցը հայտնվեց նաեւ ԿԳՄՍՆ ուշադրության կենտրոնում: Հանձնաժողովի նախագահից պաշտոնական գրությունը ստանալուց հետո նախարարությունը դեռեւս պաշտոնական դիրքորոշում չի արտահայտել ընտրությունների վերաբերյալ՝ չբացառելով նաեւ ընտրության արդյունքների բողոքարկումը:

«Եվ այսպես, չսպասելով նախարարության և Կառավարության որոշմանը՝ որոշեցի դատական հայցը ներկայացնեմ ընդդեմ Պոլիտեխնիկի ռեկտորի խայտառակ «ընտրություններ»-ի: Որպես պատասխանող կողմ՝ նշված է Պոլիտեխնիկը, սակայն մեծ սիրով հայցը կներկայացնեի հոգաբարձուների խորհրդի նախագահ Մուսայելյանի և քարտուղար Կիրակոսյանի դեմ, սակայն այդպիսի հնարավորություն չկար։ Ովքեր որ նեղվել են այս հանգամանքից, որ համալսարանի անունն է շոշափվելու դատական թեմաներով, թող մի քիչ լավ ու երկար մտածեն՝ իսկ իրենք ինչ են արել կամ արեցին, որ այս վիճակին չհասնի։ Թող որևէ մեկի մտքով չանցնի, թե կատակում էինք և կամ եկել էինք մասնակցեինք, որ լեգիտիմացնեինք ձեր կազմակերպած կեղծ մրցույթ-ընտրությունը»,- ֆեյսբուքյան իր էջում գրել է Դավիթ Ղազարյանը եւ հավելել.  

«Երևի թե մի քիչ պասիվ մնացինք և հույսը դրեցինք լիազոր ու հիմնադիր մարմինների արագ ու անաչառ արձագանքի վրա, և ոմանց թվաց, թե կարող են օգտվել խառը քաղաքական իրավիճակից և փորձել «խաղեր տան» ։ Պարոնայք, շատ լավ գիտենք, թե ում հետ եք հանդիպում, ինչեր եք խոստանում»:

Մեզ հետ զրույցում նա մանրամասնեց, որ դատարան է դիմել ռեկտորի թափուր պաշտոնի մրցույթի առաջին և երկրորդ փուլերի արդյունքները՝ ընթացակարգային խախտումների պատճառով չեղարկելու պահանջով, այն հարցերով, որոնց մասին ինքը միշտ բարձրաձայնել է:

Հիշեցնենք, որ դեռ ռեկտորի ընտրության առաջին փուլից առաջ Ղազարյանն ահազանգել էր, թե շրջանցելով կարգը՝ խորհրդի անդամներին 7 օր առաջ չեն տրամադրվել ռեկտորի պաշտոնի հավակնորդների զարգացման ծրագրերը, որպեսզի նրանք այդ ծրագրերին ծանոթանան մինչեւ նիստը: Ընտրությունից հետո էլ նշել էր, որ դիմել է Հոգաբարձուների խորհրդի քարտուղարին, նախագահին, որպեսզի իրեն տրամադրվի նիստի արձանագրության պատճենը, սակայն պատասխան այդպես էլ չէր ստացել:

«Իմ բողոքները մրցույթի կազմակերպիչներին են ուղղված, այսինքն՝ քարտուղարությանն ու նախագահությունը: Ես հարցեր էի ուղարկում, չէին պատասխանում, ի դեպ, պաշտոնապես դիմել էինք, որ ստանանք արձանագրությունը, դա նույնպես դեռ չենք ստացել: Մեզ պատասխանում են, որ նախարարության հետ դեռ ինչ-որ հարցուպատասխանի մեջ են, այդ իսկ պատճառով նպատակահարմար չեն գտնում արձանագրությունը տրամադրել, որը, ճիշտն ասած, տարօրինակ է: Այս ամենը նշում եմ, որովհետեւ մեր գործընկերներից շատերը նեղվում են, որ Պոլիտեխնիկի վարկանիշի վրա կարող է ազդել, բայց հոգաբարձուների խորհուրդը առանձին կառույց չէ, Պոլիտեխնիկի մաս է: Ես այսօր պարզեցի նաեւ, որ կարծես թե գործը վարույթ ընդունվելու ժամկետները լրացել են, վաղը հարցում կուղարկեմ դատարան, տեսնեմ՝ ինչ վիճակում է»,- ասաց նա:

Հարցին՝ իսկ ի՞նչ «խաղեր տալու» մասին է խոսքը, նորընտիր ռեկտորի՞ն նկատի ունի, Դավիթ Ղազարյանը չցանկացավ մանրամասնել՝ նշելով հետեւյալը.

«Այնպես չէ, որ օդի մեջ եմ բաներ գրել, բայց դա իմ ներքին ինֆորմացիան է, ես չեմ ցանկանա բացել, բայց դա հստակ մեսիջ է կոնկրետ մարդկանց»:

Հիշեցնենք, որ ավելի վաղ ռեկտորի թեկնածուներից մի քանիսը նշում էին Գոռ Վարդանյանի հովանավորչությամբ կատարված անօրինականությունների, ռեկտորի թեկնածուների համար ստեղծված անհավասար պայմանների մասին՝ նշելով, որ բուհի ղեկավար կազմի կողմից արդեն իսկ կա նախընտրելի թեկնածու՝ նկատի ունենալով հենց Գոռ Վարդանյանին: Ըստ շրջանառվող խոսակցությունների՝ նա նաեւ Արմեն Աշոտյանի սանիկն է:

Դավիթ Ղազարյանը նշեց նաեւ, որ, իր կարծիքով, նախարարության պատասխանի ուշացումը պայմանավորված է «Բարձրագույն կրթության եւ գիտության մասին» նոր օրենքի՝ նախագահի կողմից ստորագրման ուշացման հետ:

«Արդեն մեկ ամիս անցել է ընտրությունից, եթե անկեղծ լինեմ, մի քիչ ավելի արագ արձագանք էի սպասում նախարարությունից: Երբ արձանագրությունը հանձնաժողովի 5 անդամից ստորագրել են 2-ը, իմ կարծիքով՝ այստեղ մտածելու բան առանձնապես չկա: Ավելի շատ կարծում եմ՝ դա կապված է հաջորդ քայլերի հետ՝ ինչ պետք է արվի հետո»,- ասաց նա:

Նկատենք, որ «Բարձրագույն կրթության եւ գիտության մասին» նոր օրենքը նախագահի կողմից ստորագրվելուց հետո ուժի մեջ կմտնի անմիջապես, եւ ըստ այդմ՝ կկազմվի հոգաբարձուների նոր խորհուրդ: Եթե Պոլիտեխնիկի ռեկտորի ընտրության արդյունքները չհաստատվեն լիազոր մարմնի կողմից, ռեկտորի ընտրության եւ մնացյալ այլ հարցերը կկարգավորվեն նոր օրենքին համապատասխան, նոր ձեւավորվելիք հոգաբարձուների խորհրդի որոշումներով:

Մարիամ Գեւորգյան