Գնաճը միայն ՀՀ-ում չէ. եթե ԿԲ-ն վերաֆինանսավորման տոկոսադրույքը չբարձրացներ, այն մեզ մոտ ավելի շատ կլիներ. Մանավազյան

ՀՀ Ազգային ժողովի «Քաղաքացիական պայմանագիր» խմբակցության պատգամավոր, Ֆինանսավարկային և բյուջետային հարցերի մշտական հանձնաժողովի անդամ Արուսյակ Մանավազյանի կարծիքով՝ Կառավարության ամենատեսանելի ծրագրերից մեկը սուբվենցիաներն են, և այս օժանդակությունը ոգևորում է համայնքներին ու տեղի բնակիչներին՝ իրենց քաղաքն ու մարզն ավելի լավը դարձնելու համար:

«Պետք է նկատենք, որ այս համայնքներում կան այնպիսիները, որտեղ տասնամյակներ շարունակ տներ, ճանապարհներ, դպրոցներ ու մանկապարտեզներ չեն կառուցվել: Հիմա կառուցվում են, ու դա շատ ողջունելի է»,- նկատում է նա:

Պատգամավորի հետ «Հայկական ժամանակ»-ի ամբողջական զրույցը՝ ստորև.

- Տիկին Մանավազյան, ընթանում էին 2023 թվականի բյուջեի քննարկումները, որտեղ հայտարարվեց՝ հունվար-սեպտեմբեր ամիսների ցուցանիշներով ՀՀ-ում տնտեսական ակտիվության ցուցանիշը 14,1 տոկոս է։ Քաղաքացիները, սակայն, դժգոհում են, որ իրենց ապրելակերպում էական փոփոխություններ չեն նկատվում, կենսամակարդակը շարունակում է մնալ ցածր։ Ինչի՞ հետ եք սա կապում:

- Եթե հետևել եք «Բյուջե 2023» թվականի քննարկումներին, ապա այնտեղ ձեր հարցի պատասխանի մի մասը տվել է Կենտրոնական բանկի նախագահը: Նրա խոսքով՝ հիմա գնաճը 9.9 տոկոս է և ակնկալվում է, որ տարվա վերջ կհասնի 10 տոկոսի: Սա թերևս հիմնական պատճառներից մեկն է, որը ոչ թե միայն հայաստանյան իրականությունն է, այլև աշխարհաքաղաքական հարց է: Տեսնում ենք, թե տարբեր երկրներում ինչպես են դրսևորվում գնաճն ու դրա հետևանքները: Եթե Կենտրոնական բանկի խորհուրդը վերաֆինանսավորման տոկոսադրույքը չբարձրացներ, վստահ եմ, գնաճը Հայաստանում ավելի շատ կլիներ:

- Որպես օրենսդիր իշխանության ներկայացուցիչ՝ ինչպե՞ս եք գնահատում գործադիրի աշխատանքը 2022-ին։ Որո՞նք եք համարում արդյունավետ ծրագրեր, որ իրագործել է Կառավարությունն այս տարի, և ի՞նչ ակնկալիքներ ունեք հաջորդ տարվա համար։

- Կառավարության ամենատեսանելի ծրագրերից մեկը սուբվենցիաներն են: 2022 թվականի սուբվենցիոն ծրագրերի շրջանակում ստացվել են աննախադեպ մեծ թվով հայտեր՝ 79,5 մլրդ դրամի 461 հայտ: Կառավարության համաֆինանսավորման չափը կազմել է 43,5 մլրդ դրամ։ Հիմնական ծրագրերն ուղղված են եղել բնակավայրի փողոցների ասֆալտապատմանը, մանկապարտեզների կառուցման/հիմնանորոգմանը, խմելու ու ոռոգման ջրերի համակարգերի կառուցմանը և այլն, և այլն: Ստացվում է՝ Կառավարության օժանդակությունը ոգևորում է համայնքներին ու տեղի բնակիչներին՝ իրենց քաղաքն ու մարզն ավելի լավը դարձնելու համար: Պետք է նկատենք, որ այս համայնքներում կան այնպիսիները, որտեղ տասնամյակներ շարունակ տներ, ճանապարհներ, դպրոցներ ու մանկապարտեզներ չեն կառուցվել: Հիմա կառուցվում են, ու դա շատ ողջունելի է:

- Մեզ համար ստեղծված այս բարդ ժամանակահատվածում տեսնում ենք, որ ՀՀ կառավարությունը փորձում է ելքեր գտնել տնտեսապես կայուն գործընկերներ ձեռք բերելու հարցում։ Օրեր առաջ վարչապետը Իրանում էր, որտեղ պայմանագիր կնքվեց Իրանի և ՀՀ-ի միջեւ։ Ընդհանրապես դրական դինամիկա նկատո՞ւմ եք հայ-իրանական հարաբերություններում, ի՞նչ հետագա զարգացումներ եք սպասում այս ուղղությամբ։

- Հայ-իրանական պատմական հարաբերությունների դնամիկան այսօր տեսանելի է անգամ շարքային քաղաքացիներին: Օրեր առաջ էր վարչապետն այնտեղ, ու պետք է ընդգծեմ, որ այցը բավականին հագեցած ու արդյունավետ էր: Իրանը նախորդ ամիսների ընթացքում Հայաստանի հետ առևտրատնտեսական հարաբերություններում ունեցել է 43 տոկոս աճ, բայց նպատակադրումը, թիրախը 3 մլրդ դոլարն է: Երկու երկրների միջև լավ հարաբերությունները, վստահ եմ, հանգեցնելու են տարածաշրջանում հարաբերությունների և անվտանգության ամրապնդմանը: Այցի ընթացքում ստորագրվեց նաև Բնական գազի ոլորտում համագործակցության մասին փոխըմբռնման հուշագիրը: Էներգետիկայի, գյուղատնտեսության, ենթակառուցվածքների զարգացման, ջրային ռեսուրսների կառավարման ոլորտներում կան կոնկրետ հեռանկարներ: Կարծում եմ՝ բոլոր հիմքերը կան՝ այցը հիշարժան համարելու համար: Դրական զարգացումների ամենավերջին արտահայտումն էլ դարձավ Սյունիքի մարզկենտրոն Կապանում Իրանի գլխավոր հյուպատոսարանի բացումը:

- Իրանից բացի՝ ուրիշ ո՞ր պետությունների հետ եք համագործակցության հնարավորություններ տեսնում, որը կարող է դրական ազդեցությունն ունենալ ՀՀ-ի տնտեսության՝ է՛լ ավելի զարգացման և է՛լ ավելի մեծ հեռանկարներ ունենալու համար։

- Հետաքրքրությամբ հետևում եմ հայ-հնդկական հարաբերություններին: Երկու երկրների ներկայացուցիչների փոխադարձ այցերը, հայտարարությունները, պայմանավորվածությունները, կարծում եմ, նոր ձեռագիր են հայ-հնդկական հարաբերություններում, և ես միայն դրական եզրեր եմ այդտեղ տեսնում: Հուսամ՝ արդյունքը երկար սպասեցնել չի տա: