Ադրբեջանական ընդդիմությունը քաղաքական թեժ աշուն է խոստանում

Ադրբեջանում սահմանադրական փոփոխությունների շուրջ սեպտեմբերի 26-ին կայանալիք հանրաքվեին ընդառաջ ադրբեջանական ընդդիմությունը  քաղաքական թեժ աշուն է խոստանում: Ադրբեջանական գրեթե բոլոր ընդդիմադիր ուժերը միավորող «Ժողովրդավարական ուժերի ազգային խորհուրդ»-ը հայտարարել է սեպտեմբերի 11-ին բողոքի հանրահավաք անցկացնելու մասին: Բաքվի քաղաքապետարանն այսօր թույլատրել է հանրահավաքի անցկացումը, սակայն դրա անցկացման վայր է առաջարկվել մայրաքաղաքի արվարձաններից մեկում գտնվող «Մեհսուլ» մարզադաշտը:

«Ժողովրդավարական ուժերի ազգային խորհուրդ»-ը այսօր հայտարարել է, որ հանրահավաքը տեղի է ունենալու ի նշան Սահմանադրության մեջ նախատեսվող փոփոխությունների եւ երկրում ստեղծված ծանր սոցիալ-տնտեսական վիճակի դեմ բողոքի: Պատահական չէ, որ հանրահավաքը ընթանալու է «Ո՛չ միապետությանը, ո՛չ թալանին» կարգախոսի ներքո:

Չնայած, որ հանրահավաքը թույլատրվել է անցկացնել ոչ թե մայրաքաղաքի կենտրոնում, այլ արվարձանում, ինչպես նաեւ, որ այս օրերին ընդդիմության ակտիվիստների զանգվածային հետապնդումներ ու ձերբակալություններ են սկսվել՝ սպասվում է, որ այն բավական մարդաշատ է լինելու: Պատճառը երկրում վերջին 20 տարում ստեղծված ամենածանր վիճակն է: «Յուրաքանչյուր օր մանաթի փոխարժեքը նվազում է, փակվում են բանկեր, ձեռնարկություններ, արտասահմանյան  ընկերությունները լքում են Ադրբեջանը, աճում է գործազրկությունը եւ խորանում է սոցիալական լարվածությունը»,-առաջիկա հանրահավաքի առնչությամբ հայտարարել է «Ժողովրդավարական ուժերի ազգային խորհրդի» մաս կազմող «Ազգային ճակատ» կուսակցության նախագահ Ալի Քերիմլին: Անդրադառնալով սահմանադրական փոփոխություններին՝ նա նշել է, որ այն նպատակ ունի ամրապնդել Ալիեւների ընտանիքի իշխանությունը եւ պայմաններ ապահովել այն հորից որդուն փոխանցելու համար:

Ադրբեջանական ընդդիմությունը պնդում է, որ սահմանադրական փոփոխություններով Իլհամ Ալիեւը հիմքեր է ստեղծում իշխանությունը որդուն՝ Հեյդարին փոխանցելու համար: 19-ամյա Հեյդարը ներկայումս ուսանում է Բաքվի դիվանագիտական ակադեմիայի 3-րդ կուրսում:

Այս տարվա հուլիսի 28-ին Իլհամ Ալիեւի ներկայացրած սահմանադրական փոփոխությունների նախագծով, մասնավորապես, նախատեսվում է Սահմանադրությունից հանել այն կետը, ըստ որի՝ երկրի նախագահ կարող է դառնալ առնվազն 35 տարին լրացած քաղաքացին: Սա նշանակում է, որ այսուհետ նախագահի պաշտոնի համար իր թեկնածությունը կարող է առաջադրել նաեւ 35 տարուց ավելի փոքր քաղաքացին:

Մյուս առանցքային փոփոխությունն այն է, որ Ալիեւն առաջարկում է չեղարկել Սահմանադրության այն կետը, ըստ որի՝ Միլլի մեջլիսի պատգամավոր կարող է ընտրվել 25 տարին լրացած անձը: Ըստ նախագծի, Միլլի մեջլիսի պատգամավոր կարող է դառնալ արդեն 18 տարին լրացած քաղաքացին:

Ադրբեջանական քաղաքական շրջանակներում շրջանառվող խոսակցությունների համաձայն, Իլհամ Ալիեւը ծրագրել է 19-ամյա որդուն նախ դարձնել Միլլի մեջլիսի պատգամավոր, եւ հենց դրա համար էլ վերացնում է տարիքային սահմանափակումը: Իսկ որոշ ժամանակ հետո Հեյդարը կարող է նշանակվել երկրի փոխնախագահ, ով սահմանադրական փոփոխություններից հետո իրավունք է ունենալու նշանակել միայն նախագահը: Որոշ ժամանակ փոխնախագահի պաշտոնը զբաղեցնելուց հետո նախագահը կարող է իշխանությունը փոխանցել փոխնախագահին, որը, ինչպես ադրբեջանցի ընդդիմադիրներ են պնդում, լինելու է հենց Հեյդար Ալիեւը: Մինչեւ նրա 35 տարեկանը դառնալուն չսպասելու համար էլ վերացվում է նախագահի պաշտոնի առաջադրման համար պարտադիր 35 տարեկան լինելու կետը:

Այժմ իշխանությունը հորից որդուն փոխանցելու ալիեւյան ծրագիրը տապալելու համար ադրբեջանական ընդդիմադիր ուժերը կոչ են անում ազգաբնակչությանը դեմ քվեարկել փոփոխություններին՝ թեպետ միաժամանակ խոստովանում են, որ ընտրողների ձայները որեւէ բան չեն փոխելու, քանի որ հանրաքվեի արդյունքներն արդեն իսկ կանխորոշված են: