Միջնադար. խոշտանգել են եւ ցուցմունք կորզել

13/02/2018 schedule16:25

Տպագրվել է «Հայկական Ժամանակ» օրաթերթի՝ 2005 թվականի փետրվարի 12-ի համարում

Կինը, որին տեսնում եք նկարում, 2 երեխայի մայր Մարիամ Կարապետյանն է: Նա աշխատում է Մալաթիայի շուկայի ճաշարան-կրպակներից մեկում: Հունվարի 23-ին կրպակում սնվելուց հետո Էջմիածնի բնակիչ Կարեն Ղազարյանը ասել է, որ մոտը միայն մի 100 դոլարանոց է եւ դուրս է եկել փողը մանրելու: Քիչ անց նա ներս է մտել ճղված գրպանով եւ ասել, որ փողը գողացան: Նրա նկարագրությամբ գողերը երկուսն են եղել` մեկը կարճ եւ գեր, մյուսը` բարձրահասակ, բայց ինքը նրանց դեմքը չի տեսել: Մ.Կարապետյանը փորձել է պարզել, թե ովքեր են տարել իր հաճախորդի գումարը, դուրս է եկել կրպակից, հարցրել շուկայում աշխատողներին, բայց ոչինչ չի իմացել: Շատ չանցած ժամանել են ոստիկանության աշխատակիցները, հարցուփորձ արել ներկաներին, ապա Մարիամին ասել են, որ 15 րոպեով գնա ոստիկանություն` բացատրություն գրելու:

Մարիամը գնացել է` 15 րոպեից վերադառնալու հույսով, սակայն վերադարձել է 3 օր անց: Այդ 3 օրերի պատմությունը հնարավոր չէ անտարբեր լսել: Նրա ասելով` ոստիկանությունում իրեն տարել են մեկի մոտ, որն իրեն տեսնելով՝ միանգամից ասել է. «Դե, պուտանկա, ներկայացի»: Հետո թվով մոտ 20 ոստիկաններ, որոնցից հիշում է միայն օպերաշխատող Արտակի, Մուկուչի, մեկ էլ Չարխիֆալաքյանի անունները, սկսել են նրան ծեծել, մազերից բռնած գլուխը խփել են պատերին, պահանջել են` ասի, թե ով է գողացել Ղազարյանի փողը: Նա մոտ 2 օր դիմացել է, պնդել է, որ չգիտի, չի տեսել, որեւէ մեկի անուն տալ չի կարող, լաց է եղել, խնդրել, աղաչել, որ իրեն չծեծեն: Սակայն ծեծն ու հայհոյանքները սաստկացել են, ոստիկանները ոտքերով, ձեռքերով անընդհատ խփել են, թքել իր վրա, սպառնացել, թե այնպես կայլանդակեն, որ սեփական երեխաները չճանաչեն, ցույց են տվել, թե ինչով են այլանդակելու, ինչպես, անգամ փորձեր են արել:

Մարիամի պատմածը պարզապես հնարավոր չէ թղթին հանձնել: Գիշերը պահել են նկուղում, ցերեկը` խոշտանգել, 2 օր նա ոչինչ չի կերել: Ասում է, որ աչքերի առջեւ սեւանում էր, համոզված էր, որ ինքը կենդանի դուրս չի գալու այդտեղից, եւ այս մղձավանջից ազատվելու մի ելք է տեսել` որեւէ անուն տալ, ու տվել է իր նախկին ընկերոջ, որից վերջերս է բաժանվել եւ նրա եղբոր անունները: Արմեն եւ Արման Խաչատրյանների անունները տալուց հետո ոստիկանները հանգստացել են, ցուցմունքն արձանագրել են, ասել են, որ նա արդեն իրենց գործակալն է, սրանից հետո պիտի իրենց համար աշխատի, ասի՝ ովքեր են շուկայի մարմնավաճառները, գողերը, Մամա Ռոզան եւ այլն:

Վերջում նրան տարել են բաժնի պետ Գագիկ Վարդանյանի մոտ: Նա առաջարկել է Մարիամին, որ գրի, թե շուկայում վերջերս սպանված պարսիկին էլ է Արմենը սպանել` խոստանալով, որ դրանից հետո «կապրի՝ ոնց որ դրախտում»` տուն կվարձեն իր համար, փող կտան, երեխաներին կբերեն գյուղից եւ այլն, սակայն այս մեկին նա չի համաձայնել: Ոստիկաններն, իհարկե, միայն ցուցմունքով չեն բավարարվել, նաեւ առերեսումներ են արել Խաչատրյանների եւ Մարիամի, Խաչատրյանների եւ Կարեն Ղազարյանի միջեւ: Երկու դեպքում էլ տղաները ժխտել են իրենց մասնակցությունը, վկան ու տուժողը՝ հաստատել: Ապա Խաչատրյաններին կալանավորել են եւ նրանց վրա 176 հոդված` կողոպուտ դրել: Սակայն Մ.Կարապետյանը մի քանի օր անց, հասկանալով, որ իր պատճառով անմեղ մարդիկ են տուժում, սկսել է դիմել տարբեր անձանց ու պատմել կատարվածը:

Նա դիմում է գրել համայնքի դատախազին, օմբուդսմենին` հայտնելով. «Ծեծի-ստորացման ու սպառնալիքների տակ ինձանից կորզվել է կեղծ ցուցմունք Արման եւ Արմեն եղբայրների դեմ: Այդ ծեծի հետեւանքները դեռ կան մարմնիս վրա, եւ խնդրում եմ ձեզանից՝ ինձ ուղարկել դատաբժշկի զննման»: Մալաթիա համայնքի դատախազության աշխատակիցը (անունը չի ճշտել)` ոչնչով չի տարբերվել ոստիկաններից. սկսել է հայհոյել նրան, դուրս է վռնդել՝ սպառնալով. «Էդ տղաներին բաց կթողնենք, բայց դու կնստես զրպարտության համար»: Մ.Կարապետյանն իրեն մեղավոր է զգում. «Երկու անմեղ մարդու մեղք եմ առել ինձ վրա, ամենաստոր մարդու նման եմ ինձ պահել, բայց ո՞վ լիներ իմ տեղը ու դա չաներ»:

Դեպքից հետո նա դուրս է եկել աշխատանքից, տուն չի գնում` վախենում է, որ ոստիկանները նորից կգան իր ետեւից: Նրա անձնագիրը ոստիկանների մոտ է: Կալանավորվածների հորը ոստիկանները ասել են, որ մեղադրանքը լրիվ ապացուցված է` վկայի ու տուժողի ցուցմունքը բավական է, որ իր տղաներին 5-6 տարի ազատազրկման դատապարտեն: Երեկ մենք կապվեցինք Մալաթիայի ոստիկանապետ Վարդանյանի հետ. նա սկզբում չէր կարողանում հիշել, թե որ դեպքի մասին է խոսքը, հետո հիշեց եւ ասաց, որ ինքը հունվարին արձակուրդում է եղել, վերջում հերքեց ծեծի փաստը եւ ասաց. «Դա բացարձակ հերյուրանք է, ի՞նչ նպատակ ուներ նրան ծեծելը՝ նա ընդամենը վկա է»: Վկա, որի միակ ցուցմունքի հիման վրա են ձերբակալել «հանցագործներին»: «Ուզում եք ասել, որ մեր համակարգում կանանց ծեծում-ջարդում ե՞ն»,- հռետորական հարց տվեց Գ.Վարդանյանը` ձեւակերպելով ակնհայտը:

Հ.Գ. Ուշ երեկոյան հայտնի դարձավ, որ Մարիամ Կարապետյանին կրկին բռնությամբ տարել են ոստիկանություն: Նրա հետագա ճակատագրի մասին ընկերները եւ հարազատները ոչ մի տեղեկություն չունեն:

Արմինե Օհանյան

Տպել
956 դիտում

Հանրապետության որոշ ավտոճանապարհներին բուք է

Ո՞նց եք պատկերացնում՝ 19-րդ դպրոցից 25 ուսուցչի միանգամից դատի տայինք. ՇՄ դատախազ

«Պարտեզ» ռեստորանի մոտ տեղի ունեցած զինված միջադեպով մեղադրանք է առաջադրվել 17 անձի. ՔԿ

Ալեքսանդր Լապշինի դեմ Ադրբեջանում նոր քրեական գործեր են հարուցվել

Պատասխանատվություն չենք կրում բնապահպանական որևէ խնդրի համար. Լիդիան Արմենիան զգուշացնում է

Արտասահմանում ուսանելու հնարավորություն. ԿԳՆ-ն հայտարարում է մրցույթներ

Ոստիկանները բացահայտել են կրթօջախում կատարված ավելի քան 3.940.000 դրամի յուրացման դեպք (տեսանյութ)

Դավիթ Տոնոյանն Աբու Դաբիում ներկայացրել է նաև Սիրիայում ՀՀ մարդասիրական առաքելության խնդիրները

Այստեղ եմ նոր գործընկերություն սկսելու համար. նախագահ Արմեն Սարգսյանն այցելել է Մյունխենի տեխնիկական համալսարան

Տիգրան Խաչատրյանն ընդունել է Եվրոպական ներդրումային բանկի պատվիրակությանը

Միհրան Աղբաբյանը մեր ժողովրդի լավագույն զավակներից էր. Արմեն Սարգսյանի ցավակցական ուղերձը

Սեդրակ Քոչարյանին մեղադրանք է առաջադրվել փողերի լվացման եւ հարկերից խուսափելու համար

Ակնհայտ է հասարակության զարմանքը, որ իշխանության ներկայացուցիչները կարող են ՏԻՄ ընտրություններում պարտվել․ Կոնջորյան

Երևանի քաղաքապետարանը մոտ 760 մլն դրամ է տնտեսել գնումների գործընթացի արդյունքում

Իրանի դիրքորոշումը ԼՂ հարցում տարածաշրջանային անվտանգության տեսակետից կարեւոր զսպման գործոն է. դեսպան

Արամ Ա. Կաթողիկոսը պարգևատրել է հռչակավոր երաժիշտ Տիգրան Մանսուրյանին

Նախկինում ընդդիմությունը չի կարողացե՞լ հարցեր տալ, ուզել են հարց տալ, եկել-ծեծել ե՞ն բազկաթոռի վրա․ Մարուքյան

Կանանց ֆուտբոլի 3x3 փառատոնն առաջին անգամ անցկացվեց Երևանում (տեսանյութ)

Երեւանում հայտնաբերվել է Իրանի 51-ամյա քաղաքացու դի. ԱԻՆ

Բուլղարիայի խորհրդարանի նախագահն Արարատ Միրզոյանին հրավիրել է Սոֆիա