Լարված իրավիճակ «Գյումրին առանց տնակների» հիմնադրամում. նախկին եւ ներկա տնօրենները մեղադրել են միմյանց

Այսօր «Երկխոսությունների մեդիա կենտրոնում» մամուլի ասուլիս էր հրավիրել Գյումրին առանց տնակների հիմնադրամի գործադիր տնօրեն Մհեր Խաչատրյանն ու խոսել 2018-ի հունվարից սկսած բացահայտումների, բնակբաշխումների եւ տնակների քանդման գործընթացներում թույլ տրված ապօրինությունների մասին: Բոլորի, այդ թվում եւ հիմնադրամի հոգաբարձուների խորհրդի անդամների համար անակնկալ հայտարարություն արեց Մհեր Խաչատրյանն ու հիմնադրամի նախկին տնօրեն, ներկա պահին հոգաբարձուների խորհրդի անդամ Ղարիբ Հարությունյանին մեղադրեց ֆինանսական չարաշահումների մեջ: «Ինչ հիմա ասելու եմ, ես փաստերն ունեմ, հիմքերն ունեմ, հիմնադրամի ֆինանսական հաշվետվությունների մեջ կան չարաշահումներ նախկին տնօրենի կողմից: Ես կոնկրետ հիմքերը, փաստերը  ունեմ ձեռքիս տակ: Խոսքը 2017 թվականի մասին է, երբ տնօրեն էր Ղարիբ Հարությունյանը: Չեմ ուզում ինչ-որ որակավորում տալ, բայց ասեմ, որ հոգաբարձուների խորհրդի նիստին ներկայացվել է կեղծ հաշվետվություն եւ կա ծախսերի հետ կապված ֆինանսական չարաշահում, օրինակ աշխատակից չունենալու ժամանակահատվածում աշխատավարձի ձեւակերպում, եւ այն»:

Այս հայտարարությունից կարճ ժամանակ անց հիմնադրամի մեկ այլ անդամի հետ ասուլիսի դահլիճ մտավ հենց Ղարիբ Հարությունյանն ու հայտարարեց, որ Մհեր Խաչատրյանն ինքնագործունեությամբ է զբաղված, քանի որ տեղի ունեցող ասուլիսի մասին «Գյումրին առանց տնակների» հիմնադրամի հոգաբարձուների անդամներից որեւէ մեկը նախապես չի իմացել: Ավելին, Ըստ Ղարիբ Հարությունյանի, այս ասուլիսն ունի քաղաքական ենթատեքստ, նաեւ գիտի, թե ով է ուղղորդում Մհեր Խաչատրյանին եւ ինչ նպատակով: Նշենք, որ վերջին օրերին Գյումրիում պտտվող խոսակցությունների համաձայն՝ Շիրակի մարզպետի պաշտոնի համար քննարկվել է Տիգրան Պետրոսյանի թեկնածությունը, որը ցանկություն է հայտնել իր հետ մարզպետարան բերել նաեւ Ղարիբ Հարությունյանին:

«Մենք որեւէ հանձնում-ընդունում չենք արել եւ նա (նկատի ունի հինադրամի գործադիր տնօրեն Մհեր Խաչատրյանին) չի տիրապետում որեւէ պաշտոնական տեղեկատվության: Հանձնման-ընդունման խումբ է ձեւավորվել, եւ այսօր ժամը 17:00-ին այդ հանձնախմբի նիստն է: Եւ, ինչպես է հիմա նա հայտարարում չարաշահումների մասին, երբ որ հանձնում-ընդունում չի եղել: Ես կոչ եմ անում իրավապահներին՝ զբաղվել այս հայտարարությամբ հենց այս պահից սկսած, եւ, երկրորդ, քանի որ հաղորդում է եղել հանցագործության մասին, ես երկրորդ կոչն եմ անում՝ հաղորդում զրպարտության մասին, քանի որ այս պահին իմ նկատմամբ եղել է զրպարտություն: Դատախազությունը թող գործ հարուցի: Իսկ խորհուրդը կզբաղվի տնօրենի ինքնագործունեության այս դեպքով»,-հայտարարեց  Ղարիբ Հարությունյանը:

Մհեր Խաչատրյանը եւս ապացույցներ պահանջեց: Պահանջեց, որ Ղարիբ Հարությունյանը փաստերով ապացուցի ասուլիսի քաղաքական ենթատեքստ ունենալն ու հրապարակի, թե ով կամ ովքեր են իրեն ուղղորդում: