Եվ դարձյալ «Եվրատեսիլ». Անդրեն փրկվել է խեղդվելուց

Տպագրվել է «Հայկական Ժամանակ» օրաթերթի՝ 2006 թվականի հունիսի 1-ի համարում

«Եվրատեսիլ-2006»-ի կիսաեզրափակիչում Անդրեի ելույթի ժամանակ, երբ Հայաստանում բոլոր նրան լսողները թերեւս բռնել էին գլուխները եւ շատ ցավում էին Անդրեի անհաջող ելույթի համար, պարզվում է, Անդրեն պարզապես փրկվել է խեղդվելուց: Երեկ Անդրեն մամուլի ասուլիս էր հրավիրել, եւ մենք փորձեցինք պարզել, թե ինչպես էր ստացվել, որ մոտ 4-ամսյա ամենօրյա փորձերից հետո նա նման ելույթ ունեցավ, եւ ինչպես կարելի է բացատրել հատկապես կիսաեզրափակիչի ժամանակ թույլ տրված սխալները: «Իսկապես, թերությունները, կարող է, շատ են եղել: Բայց երբ ես իջնում էի փոքրիկ հարթակից, խոսափողն ընկավ բերանս ու մնաց երկու շուրթերիս արանքում: Ես կրկին բարձրացա, եւ «ահ»՝ այս տնքոցը եղավ: Հետո ես խոսափողը հանեցի եւ սկսեցի երգել: Չգիտեմ, ինչու այդպես եղավ:

Հեռուստադիտողը դժվար թե նկատած լիներ, որ քիչ էր մնում՝ խոսափողը կուլ տայի: Նախորդ օրերին բազմիցս փորձեր էին եղել եւ ոչ մի նման դեպք: Իսկ մարդկանց ավելի շատ թվացել էր, թե ես հուզմունքից մոռացել եմ այդ ֆրազան: Բայց, ինչպես տեսնում եք, այստեղ մաքուր վոկալային տվյալները չեն, որ գնահատվում են»,- բացատրում էր Անդրեն` հիշեցնելով Կիպրոսի ներկայացուցչին, որը շատ լավ ելույթ ունեցավ, բայց այդպես էլ չանցավ անգամ եզրափակիչ փուլ: Հիշեցնենք, որ Աթենքում կայացած «Եվրատեսիլի» դեռ կիսաեզրափակիչից անմիջապես հետո Հանրային հեռուստառադիոխորհրդի նախագահ Ալեքսան Հարությունյանը մեզ հայտնել էր, որ Անդրեի ելույթի ժամանակ նաեւ տեխնիկան է շատ վատը եղել: Մեր այն հարցին, թե ինչպես էր ստացվել, որ հենց Հայաստանի դեպքում էր տեխնիկան վատը եղել, եւ արդյո՞ք հնարավոր չէր բազմաթիվ փորձերից հետո կարգավորել այդ հարցը, Անդրեն պատասխանեց.

«Նույն տեխնիկական պրոբլեմները միայն իմ դեպքում չէին: Եւ առաջինը լինելը չեմ կարծում, որ կապ ուներ դրա հետ: Մենք օրական մի քանի անգամ մոտենում եւ ասում էինք, որ պրոբլեմ կա, նրանք գրանցում էին եւ հաջորդ փորձի ժամանակ կրկին նույնն էր, ու վերջում նրանք արեցին այնպես, ինչպես իրենք էին ուզում»: Ըստ Անդրեի, տեխնիկական խնդիրներ չեն եղել միայն Կիպրոսի եւ Հունաստանի ներկայացուցիչների ելույթի ժամանակ: Մեր այն հարցին, արդյո՞ք դա կարելի է դիտավորություն համարել, Անդրեն ծիծաղելով պատասխանեց. «Չեմ կարծում, բայց կասկածում եմ»: Համենայնդեպս, ըստ «Հ1»-ի արտաքին կապերի բաժնի պետ Դիանա Մնացականյանի, Աթենքում ամբողջ տեխնիկան ապահովել է գերմանական մի ընկերություն, որն աշխարհում համարվում է լավագույնը եւ ապահովում է այնպիսի երգիչների համերգների տեխնիկան, ինչպիսիք են Մադոննան եւ նման մեծության այլ աստղեր:

Մեր այն հարցին, արդյո՞ք «Եվրատեսիլի» քվեարկության պատկերը չի նշանակում, որ եկող տարիներին մենք կարող ենք սույն մրցույթին ուղարկել ցանկացած մակարդակի երգչի, քանի որ, ըստ էության, միայն սփյուռքի շնորհիվ մեզ հաջողվեց գրավել 8-րդ տեղը, եւ այդ տեղը մենք, կարելի է ասել, ապահոված ունենք, Անդրեն պատասխանեց. «Անշուշտ, հաղթանակի համար իր մեծ մասնաբաժինն ուներ սփյուռքը: Մանավանդ Ֆրանսիայի հայկական համայնքը մեծ դեր է խաղացել, որ այնտեղ այս տարի ավելի ակտիվ դիտեն մրցույթը»: Բայց, ըստ նրա, 8-րդ հորիզոնականը միայն սփյուռքի շնորհիվ չի ապահովվել: Իսկ «Եվրատեսիլն», Անդրեի կարծիքով, ամենաանկանխատեսելի մրցույթն է, եւ երբեք չես կարող ասել, թե ով կդառնա հաղթողը, ու դա էր թերեւս ապացուցում ֆիննական «Լորդի» խմբի հաղթանակը:

«Այսինքն, չգիտես, կարող է վերջում այս մրցույթը դառնա ուրախների եւ հնարամիտների մրցույթ: Ֆինները եւ Լիտվան եկել էին ծաղրելու «Եվրատեսիլը», բայց նրանք դարձան առաջատար, եւ հեղափոխություն եղավ»,- ասում էր Անդրեն: Իսկ ընդհանուր առմամբ, Անդրեն դժգոհ չէր իր ելույթից եւ համաձայն չէր մեր այն դիտարկմանը, որ նրա ելույթը հատկապես կիսաեզրափակիչ փուլում մեր երկրում այնքան էլ լավ չի ընդունվել: «Այնքան, ինչքան ես եմ շարժվել, թող որեւէ մեկը փորձի վազել եւ խոսել, ոչ թե երգել, այլ խոսել»,- ասում էր նա: Մեր այն հարցին, մի՞թե հնարավոր չէր երգի պարը բեմադրելիս հաշվի առնել, որ կենդանի եթերի ժամանակ կարող են խնդիրներ առաջանալ, Դիանա Մնացականյանը պնդում էր, թե պարի բեմադրիչ Եգոր Դրուժինինն այնքան պրոֆեսիոնալ է, որ գիտեր, թե տվյալ նոտայի վրա ինչ անկյան տակ կարելի է թեքվել, եւ ինչ շարժում կարելի է անել:

Ինչեւէ, «Եվրատեսիլ-2006»-ն արդեն ետեւում է եւ Անդրեն հիմա երազում է միայն հանգստի մասին: Նա, ի դեպ, մրցույթից հետո բազմաթիվ հրավերներ է ստացել, որոնք, սակայն, դեռ հստակեցված չեն: Ու թեեւ «Եվրատեսիլ» մրցույթի կանոնները թույլ են տալիս, որ եկող տարի եւս նույն երգիչը ներկայացնի իր երկիրը, սակայն եկող տարի Հայաստանը կներկայացնի բոլորովին այլ երգիչ: Ի դեպ, եկող տարի նախատեսվում է փոխել «Եվրատեսիլի» կանոնները եւ եզրափակիչում լավագույն առաջատար համարել ոչ թե տասնյակին, այլ վեցյակին: Ինչպես երեկ ասաց Հանրային հեռուստատեսության արտաքին կապերի բաժնի պետ Դիանա Մնացականյանը, սույն նորամուծությունը նախատեսված է եղել նաեւ այս տարի, սակայն մեր բախտը պարզապես բերել է, որ դա չի իրագործվել: Չի բացառվում նաեւ, որ արվի երկու եզրափակիչ փուլ, բայց այս ամենը դեռ խոսակցությունների մակարդակով է, եւ հայտնի չէ, թե ի վերջո ինչ նոր կանոններ եկող տարի կսահմանեն մրցույթի կազմակերպիչները:

Լուսինե Բարսեղյան