Նոր միություն. խոստանում են տկանց չխորել 

Տպագրվել է «Հայկական Ժամանակ» օրաթերթի՝ 2006 թվականի հունիսի 27-ի համարում

Թատերական գործիչների միության վերջին սկանդալային համագումարը, երբ Սոս Սարգսյանն, ըստ էության, տապալվեց (հիշեցնենք, որ հին ուժերը թույլ չտվեցին նրան դառնալու միության նախագահ), ռեժիսոր Արմեն Մազմանյանը հրապարակավ ճղեց իր մանդատը, եւ որոշ գործիչներ իրենց պատրաստակամությունը հայտնեցին միությունից դուրս գալու, ի վերջո տվեց իր արդյունքները: Երեկ թատերական մի խումբ գործիչներ, որոնք ԹԳՄ համագումարի ժամանակ լուրջ ընդդիմություն էին, արդեն պաշտոնապես հայտարարեցին նոր միության ստեղծման մասին: Եւ նոր միությունը, որը կոչվելու է «Հայկական թատերական ընկերություն» միավորում, երեկ գումարեց իր հիմնադիր համագումարը:

«Նոր սկանդալ եւ աժիոտաժ սարքելու ոչ մի ցանկություն չկա: Կա այն պարզ գիտակցումը, որ 20-րդ դարը վաղուց անցել է, ազգ, պետություն, թատրոն փրկելու մտածելակերպը վաղուց հնացել է, եւ պետք են նոր ֆորմատներ, կան պարզագույն անելիքներ աշխարհի հետ գլոբալիզացիայի, ինտերնետիզացիայի, մշակութային փոխկոմունիկացիայի հարցերում: Մեր նախորդ ընտրությունը եղել է շատ բարդ, դրել ենք հարցեր, չենք ստացել պատասխաններ: Այժմ ստեղծվում է մի միություն, որն ունի ցավալի խնդիրներ, եւ դրա համար ֆինանսական մեծ հատկացումներ պետք չեն: Պետք է դաշտն ավելի դեմոկրատացվի եւ մաքրվի: Մենք բաց ենք բոլորի համար, որոնց հուզում է թատրոնն ընդհանրապես եւ վաղվա թատրոնը մասնավորապես, որովհետեւ երեկվա թատրոնը մահացել է, մենք դա փաստել ենք, ուղղակի չենք ասում, որ տրամադրություններս չընկնի»,- հայտարարեց ռեժիսոր Արմեն Մազմանյանը:

Եւ որպեսզի նոր միությունը եւս չդառնա ամբիցիաներ բավարարելու տեղ, հիմնադիրները որոշել են, որ այստեղ նախագահները պետք է աշխատեն ռոտացիոն սկզբունքով: Այսինքն, 2 տարին մեկ լինելու է համագումար, լինելու են չորս համանախագահներ, որոնք ռոտացիոն սկզբունքով 6 ամիսը մեկ փոխարինելու են իրար: Առաջին նախագահն ընտրվում է համագումարի կողմից, իսկ մյուսներին 6 ամիսը մեկ ընտրում է միության վարչությունը: Նախագահը կատարելու է զուտ տեխնիկական, կոորդինացիոն ֆունկցիաներ, իսկ որոշումներ կայացնողը պետք է լինի միության վարչությունը: «Մենք ուզում ենք ի սկզբանե վերացնել թայֆաբազությունը: Տեսնել էլի մի աթոռ, որ մեկին պետք է ծառայի, չենք ուզում»,- ասում էր Արմեն Մազմանյանը՝ հրապարակավ խոստանալով, որ այսուհետ ոչ մի դերասանի, ոչ մի թատրոնի խնդիր «տկանց չի մնա»:

Միությունն ունենալու է իրավաբան, որը զբաղվելու է թատրոնների հարցերով: Հիմնադիրները, որոնց թվում են Տիկնիկային թատրոնի գեղարվեստական ղեկավար Ռուբեն Բաբայանը, Կամերային թատրոնի ղեկավար Արա Երնջակյանը, Երաժշտական կամերային թատրոնի ղեկավար Արմեն Մելիքսեթյանը, Մնջախաղի թատրոնի ղեկավար Ժիրայր Դադասյանը եւ «Գոյ» թատրոնի ղեկավար Արմեն Մազմանյանը, պատրաստվում են թատրոններում առաջացած ցանկացած խնդիր անմիջապես դարձնել հրապարակային, որպեսզի, ինչպես ասում էր Արմեն Մազմանյանը, ոչ մի խնդիր տկանց չփորձվի խորվի, թատրոն ծախվի ու բռնաբարվի: Այսպիսով, ի՞նչ է պատրաստվում անել նորաստեղծ միությունը: Նախ, միության հիմնադիրներից Ռուբեն Բաբայանը, որին, ի դեպ, երեկ համագումարն ընտրեց միության առաջին նախագահ, նախ, հայտարարեց, որ փակված չէ Փոսի թատրոնի  վաճառքի հարցը:

«Տեղի է ունեցել կեղծիք, եւ խնդրում եմ, որպեսզի իմ այս խոսքն ընդունվի որպես դիմում դատախազությանը: Եթե դատախազությունն իսկապես շահագրգռված է, պետք է բացահայտվի կեղծիքը եւ քրեական հանցագործությունը, մեղավորներին պետք է պատժի ենթարկել, առգրավել նրանց ունեցվածքը եւ այդ գումարով կառուցել նոր Փոսի թատրոն»,- հայտարարեց Ռուբեն Բաբայանը: Նոր միությունը մշտապես ուշադրության կենտրոնում է պահելու Մնջախաղի թատրոնի հարցը, որը բոմժի կարգավիճակով արդեն մի քանի տարի է, հայտնվել է փողոցում: Այնուհետեւ, ստեղծվելու է դերասանների բորսա: Այսինքն, ստեղծվելու է կայք, որտեղ տեղադրվելու են դերասանների, ռեժիսորների եւ թատերական գործիչների բոլոր տվյալները: Դա հնարավորություն կտա նաեւ դրսի մարդկանց տեղեկացված լինելու մեր թատերական գործիչների մասին:

Սա իր հերթին ենթադրում է նոր հրավերներ, ծանոթություններ եւ այլն: Ստեղծվելու է ինֆորմացիոն ցանց, որպեսզի բոլոր թատրոնները տեղեկացված լինեն աշխարհում կատարվող թատերական բոլոր իրադարձություններին: Մշակվելու է «Թատրոնի մասին» օրենքի նախագիծ, որն ի տարբերություն ներկայիս նախագծի, հնարավորություն կտա թատրոններին զարգանալու: Ստեղծվելու է ազատ բեմ հասկացությունը: Այսինքն, բոլոր երիտասարդներին, առանց բացառության, հնարավորություն է տրվելու բեմադրություններ անելու:

Այնուհետեւ նոր միության գեղխորհուրդը կորոշի, թե որ ներկայացումը կարելի է մտցնել թատրոնների խաղացանկ, ֆինանսավորել եւ այլն: Եւ ընդհանրապես, նորաստեղծ այս միությունն, ըստ էության, լինելու է երիտասարդ թատերական գործիչների միություն: «Ես արդեն տագնապով եմ նայում, որ նոր սերունդ չի գալիս թատրոն: Պետք  է ապահովել մի վիճակ, որպեսզի վաղը երիտասարդական պայթյուն լինի: Այս թմբիրից պետք է դուրս գալ: Այս միությունը պետք է ստեղծվի, որպեսզի լինեն նաեւ նոր, հետաքրքիր երեւույթներ»,- երեկ ասում էր Մնջախաղի թատրոնի գեղեկավար Ժիրայր Դադասյանը:

Հ.Գ. Երեկ նորաստեղծ միության համագումարին ներկա էր նաեւ ՀԹԳՄ նախագահ Երվանդ Ղազանչյանը: «Պիտի հիասթափեցնեմ շատերին՝ ասելով, որ շատ ուրախ եմ այս միության ստեղծմամբ: Այսօր այնքան խնդիրներ են կուտակվել թատրոնի շուրջ, որ բավական դժվարացել է վիճակը: Ես, իրոք, ցանկանում եմ, որ այս միությունը սատար կանգնի թատրոններին: Մենք մեր արածը պիտի անենք, դուք էլ աշխատեք անել մեր չարածը: Հաջողություն ձեզ»,- ասաց Երվանդ Ղազանչյանը: Ի դեպ, նոր միության պատվավոր նախագահ կդառնա Սոս Սարգսյանը:

Լուսինե Բարսեղյան