Հայաստանում երբեք չի եղել քվեարկություն մի պայմաններում, երբ եթերում կա 5 ընդդիմադիր հեռուստատեսություն․ Փաշինյան

Ազգային ժողովում կառավարության հետ հարց ու պատասխանի ժամանակ «Իմ քայլը» խմբակցության պատգամավոր Սիսակ Գաբրիելյանը ՀՀ վարչապետ Նիկոլ Փաշինյանին խնդրեց պարզաբանել ԱԺ-ում հանրաքվեի վերաբերյալ հարցի քննարկման ժամանակ իր այն հայտարարությունը, ըստ որի՝ բոլոր այն մարդիկ, որոնք կփորձեն իրավական կամ այլ ճանապարհով խոչընդոտ հարուցել ժողովրդի ազատ կամարտահայտմանը, նրանք կարժանանան ուժեղ հակահարվածի՝ որպես հակաժողովրդավարական եւ հակապետական ուժեր․

«Ինչպես ասում են՝ «գող, սիրտը՝ դող», ոմանք շտապեցին հայտարարել, որ դաժան օրեր են սպասվում։ Ի՞նչ նկատի ունեիք, ի՞նչ եք պատրաստվում անել, արդյոք վառե՞լ նրանց մեքենաները, որովհետեւ նման հարցադրում է հնչել ԱԺ ամբիոնից»,- ասաց Գաբրիելյանը՝ նկատի ունենալով ԼՀԿ խմբակցության ղեկավար Էդմոն Մարուքյանի ելույթը։

«Եթե մենք մեքենա վառող լինեինք, մեզ հետ էդպես չէին խոսի, որովհետեւ եղել են ժամանակներ, եղել են մեքենա վառողներ, պադյեզդներում մարդ ծեծողներ, եւ էդ նույն մարդիկ երբեք էդ մարդկանց հետ էդ տոնով չեն խոսել, որովհետեւ իմացել են, որ իսկապես կարող է հաջորդի մեքենա վառելը, որոշ դեպքերում նաեւ ավելի համոզիչ մեթոդներ։ Ես ուրախ եմ, որ այսօր մեր կառավարության պայմաններում այդպիսի տոնայնությամբ խոսակցություն է տեղի ունենում կառավարության ու վարչապետի հասցեին»,- ասաց վարչապետը՝ հավելելով, որ այն ժամանակ, երբ ինքն էր այդպես խոսում, այսօրվա մի շարք ընդդիմադիր գործընկերներ ուղղակի սփրթնում էին ԱԺ դահլիճում նստած․

«Ես հիմա ուրախ եմ, որ նրանք վերագտել են կամ գտել են իրենց վստահությունը»։

Փաշինյանը պարզաբանեց, թե ինչ է նկատի ունեցել՝ ասելով՝ ով կխոչընդոտի ժողովրդի ազատ կամարտահայտմանը, կհամարեն հակապետական ուժ․

«Ինձ թվացել է, որ բոլոր ժամանակների ընդդիմադիրներս էդպես ենք վերաբերվել, որ ոչ թե ով չի քվեարկում «այո», այլ խոչընդոտում է կամարտահայտմանը․․․ մեր երազանքը դա չի՞ եղել։ Ասել եմ՝ իրավական խոչընդոտ։ Ինչ եմ ակնարկել, որ եթե էս որոշումը ՍԴ-ում վիճարկվի, մենք դա էդպես կգնահատենք։ Ինչո՞ւ, որովհետեւ ասում ենք՝ ժողովրդին հարցնենք, եթե ուժ կա՝ ասում է ՝ չէ, ես ժողովրդին չեմ ուզում հարցնել, ուզում եմ հարցնել ՍԴ-ին, առավել եւս այս իրավիճակում, բխում է որոշակի հետեւություն։ Իսկ երբ ես ասում եմ՝ մենք պետք է երաշխավորենք ժողովրդի ազատ կամարտահայտությունը, ասում ենք՝ եկեք ձեր փաստարկները ժողովրդին ասեք, մենք էլ մերը կբերենք, ժողովուրդը կորոշի»։

Փաշինյանը հայտարարեց, որ Հայաստանում երբեք չի եղել քվեարկություն մի պայմաններում, երբ եթերում կա 5 ընդդիմադիր հեռուստատեսություն․

«ՀՀ պատմության մեջ երբեք այսպիսի պայմաններում քվեարկություն չի եղել, եւ չի եղել, երբ ՀՀ-ն մամուլի ազատության չափանիշով կիսում է աշխարհում 8-րդ տեղը ֆրանսիայի հետ։ Էդ ո՞ւմ բերանն ենք մենք փակում, ո՞ւմ մեքենան ենք վառում, եւ․․․շնորհակալություն»,- եզրափակեց վարչապետը։