Իջեւանի ԲԿ տնօրենի պաշտոնի հավակնորդը պնդում է՝ ամեն ինչ արել են, որ ինքը չհաղթի, մարզպետին լավ աշխատող պետք չէ

Տավուշի մարզի «Իջեւան բժշկական կենտրոնի» տնօրենի թափուր պաշտոնի մրցույթի արդյունքների վերաբերյալ կասկածները, որոնք դեռ ամիսներ առաջ հայտնեց այդ մրցույթի մասնակիցներից մեկը, դեռեւս չեն փարատվում եւ նա շարունակում է պնդել, որ իր իրավունքները խախտվել են: Վազգեն Մարգարյանը վստահ է, որ երկրորդ անգամ անցկացված մրցույթում հաղթողների մեջ իր անունն էլ պետք է լիներ, մինչդեռ կենտրոնն արդեն նոր տնօրեն ունի:

Անցած տարի Իջեւանի ԲԿ-ի տնօրենի պաշտոնակատար, նույն պաշտոնի հավակնորդ Վազգեն Մարգարյանը բոյկոտել էր մրցույթի գրավորի փուլը՝ նշելով, որ թեստում ընդգրկված առաջադրանքների մեծամասնությունը դուրս է այն հարցաշարից, որը նախապես տրամադրվել է իրեն: Արդյունքները բողոքարկելուց հետո երկրորդ անգամ էր մրցույթ կազմակերպվել: Գրավոր փուլում 100 միավոր հավաքելուց հետո Մարգարյանը չէր հաղթահարել մրցույթի 2-րդ՝ բանավոր փուլը, քանի որ, ըստ հանձնաժողովի, 5-ից 2 հարցին սխալ էր պատասխանել:

Մասնակիցը սա էլ էր բողոքարկել: Բողոքարկման հանձնաժողովի եզրակացության համաձայն՝ նշված երկու հարցերից մեկը ձեւակերպված է եղել ոչ հստակ, ուստի Վազգեն Մարգարյանի պատասխանը եւս կարող էր ճիշտ համարվել: Այդուհանդերձ, մրցույթի հաղթողները շարունակել են մնալ երկուսը՝ Էդուարդ Գրիգորյանը եւ Արսեն Մկրտչյանը, որոնցից առաջինին էլ Տավուշի մարզպետը նշանակել է Իջեւանի բժշկական կենտրոնի տնօրեն: 

Մարգարյանը մեզ հետ զրույցում նշեց, որ կարծես ամեն ինչ արվում է, որ ինքը չդառնա տնօրեն: «Եթե մարզպետը չի ուզում, որ ինչ-որ մեկը հաղթի, չի հաղթում»,- ասաց նա:

Նշենք, որ բողոքարկման հանձնաժողովի կողմից տրված եզրակացության մեջ նշված է, որ քննության հարցերից մեկը, որը հանձնաժողովը համարել է սխալ, կարող է դիտվել ճիշտ պատասխան, իսկ 2-րդի դեպքում նշված է, որ հանձնաժողովի անդամը եւս ճիշտ չի հնչեցրել հարցի պատասխանը:

Ի տարբերություն Վազգեն Մարգարյանի, որը պնդում է, թե մրցույթի բանավոր փուլում սխալ համարված երկու հարցերից մեկը ճիշտ համարվելու դեպքում ինքը եւս պետք է հաղթող ճանաչվեր, ու հետեւաբար անհրաժեշտ է երրորդ անգամ անցկացնել թափուր պաշտոնի մրցույց, Տավուշի մարզպետարանում այլ կարծիք ունեն: 

«Հանձնաժողովի կողմից տրված եզրակացության հիման վրա մարզպետը որոշում է կայացրել մրցույթի արդյունքը մասնակից Վազգեն Մարգարյանի մասով անփոփոխ թողնելու մասին: Հետեւաբար նա չէր կարող համարվել մրցույթի հաղթող եւ արդյունքների վերանայման կարիք չկա»,- նշված է մեզ տրամադրված պատասխան գրության մեջ:

Բողոքարկման հանձնաժողովի եզրակացությունը ստանալուց Մարգարյանը եւս գրավոր դիմել է Տավուշի մարզպետ Հայկ Չոբանյանին՝ իմանալու հաղթե՞լ է, թե՞ ոչ: Պատասխան նամակում նշված է եղել, որ հաղթողները միայն երկուսն են: Նա այժմ ցանկանում է, որ մարզպետը հիմնավորի այս որոշումը:

Ընդգծենք, որ ՀՀ կառավարության N992-Ն որոշմամբ բուժհաստատության տնօրենի թափուր պաշտոնի մրցույթի 2-րդ փուլում հարցատոմսերի առնվազն 4 հարցերի պատասխանները ճիշտ գնահատվելու դեպքում՝ մասնակիցն անցնում է մրցույթի երրորդ փուլ, որի ժամանակ ներկայացվում է կազմակերպության զարգացման նախնական ծրագիրը եւ անցկացվում է քվեարկություն:

Ըստ կարգի, հաղթող մասնակիցներից տնօրենին նշանակում է մարզպետը: Նրա որոշմամբ, ինչպես նշեցինք, ԲԿ-ի ղեկավար է նշանակվել Էդուարդ Գրիգորյանը, իսկ փոխտնօրեն՝ մյուս հաղթող Արսեն Մկրտչյանը:

Մարգարյանի խոսքով՝ նոր տնօրենը մարզպետի համագյուղացին է, այդ պատճառով էլ հենց ինքն է նշանակվել: Փոխտնօրենն էլ Լոռու մարզի «Սպիտակի ԲԿ»-ում է աշխատել եւ ազատվել ֆինանսական խախտումների պատճառով:

Ինչպես հավելեց, «Իջեւանի ԲԿ»-ում այլ բժիշկներ եւս կային, որոնք կցանկանային մասնակցել թափուր պաշտոնի մրցույթին, սակայն չեն մասնակցել, որովհետեւ գիտեին, որ առանց մարզպետի համաձայնության ոչ ոք չի կարող հաղթել:

Մարգարյանի փոխանցմամբ՝ երբ ինքն էր ղեկավարում բուժհաստատությունը, 7 ամսվա մեջ 130 միլիոնով ավելացրել է ԲԿ-ի բյուջեն պետպատվերի եւ վճարովի ծառայությունների գծով, նաեւ նշված ժամանակում 75 միլիոնով աշխատավարձի ֆոնդն ավելացրել:

«Մարզի այլ հիվանդանոցների տնօրենները հազիվ գոյությունը քարշ են տալիս, ֆինանսական առումով ծայրը ծայրին չեն հասցնում, աշխատանքը վատ են կատարում, իրենց ոչ մի նկատողություն չի տվել մարզպետը, մեկին գործից չի ազատել: Ես լավ աշխատանքի, ցուցանիշների պայմաններում ամեն ինչ անում եմ, դրանից հետո չի ցանկանում ինձ հետ աշխատել: Այստեղ ցանկացած մարդու մտքով մի բան է անցնում. ինքն այլ ցանկություններ ու ախորժակներ ունի»,- նշեց Մարգարյանը՝ հավելելով, որ պարզվեց՝ լավ աշխատանքը մարզպետին չի հետաքրքրում: