Եթե այդ սահմանն այսօր ճանաչելը դավաճանություն է, ապա 2010-ին՝ առավել ևս դավաճանություն էր. Փաշինյան

Սյունիք կատարած այցի շրջանակում վարչապետ Նիկոլ Փաշինյանը Սիսիանում հանդիպում ունեցավ քաղաքացիների հետ։ Քաղաքացիների հետ հանդիպման ժամանակ վարչապետը կոչ արեց նախ՝ մեկ րոպե լռությամբ հարգել հանուն Հայրենիքի կյանքը զոհած հերոսների հիշատակը, իսկ դրանից հետո հորդորեց ծափեր ու վանկարկումներ չանել՝ հաշվի առնելով, որ եռօրյա սուգ է հայտարարված երկրում:

«Այսօր շատ է խոսվում այն մասին, որ այն, ինչ տեղի է ունենում Սյունիքի սահմաններին, դա Սյունքիը հանձնելու պրոցես է, Սյունքի անվտանգությունը հարվածի տակ դնելու պրոցես է, իրականում ուղիղ հակառակն է: Խնդիրն այն է, որ երբ մենք մեր սահմանապահ զորքերը կանգնեցնում ենք Հայաստանի սահմանին, դրանով մեր անվտանգության աստիճանը ուժեղանում է, որովհետև Հայաստանի Հանրապետության սահմանը նաև անվտանգային այն համակարգի սահմանն է դառնում, որի անդամ ենք մենք։ Հիմա հաջորդ հարցը, որ ծագում է, հետևյալն է, մեզ ասում են ՝ բա ինչի՞ եք էդ սահմանին կանգնեցնում եք, բա որ էդ սահմանին կանգնեցնում եք, ո՞վ է որոշել այդ սահմանը, և ի՞նչ իրավական հիմքով է որոշվել այդ սահմանը։ Եվ ուզում եմ ասել, որ այսպիսի հարց տալիս են նաև ասենք, օրինակ, 2010 թվականին ԱԺ պատգամավոր եղած, նախարար եղած և ամենատարբեր պաշտոններ զբաղեցրած անձինք»։

Վարչապետի խոսքով՝ այդ համայնքների վարչական սահմանների նկարագարությունը որոշվել է «Հայաստանի Հանրապետության վարչատարածքային բաժանման մասին» օրենքով, որն ընդունվել է 2010 թվականին։ «Եվ այդ օրենքում, օրինակ, Ներքին Խնձորեսկ համայնքի, Տեղ համայնքի վարչական սահմանների նկարագրությունը տրված է նաև Ադրբեջանի հետ սահման։ Այսինքն՝ դա 2010 թվին է եղել, բա էն ժամանակ ինչի՞ է օրենքի մեջ գրվել և այն ժամանակվա կառավարությունը ներկայացրել է օրենքը։ Կառավարությունը, որովհետև վարչատարածքային բաժանման մասին օրենսդրական նախաձեռնություն ցուցաբերելու բացառիկ իրավունքը պատկանում է Հայաստանի Հանրապետության կառավարությանը։ Կառավարությունը ընդունել է այդ օրենքը, որտեղ նկարագրված են այսօրվա մեր բոլոր խնդրահարույց սահմանները, այսինքն որտեղ որ խնդիր է առաջանում, սահմանները նկարագրել են։  Դե այն կողմից նկարագրել են, պարզ է, հարևան համայնքը, այն մյուս կողմից նկարագրել է Ադրբեջանի Հանրապետության սահմանը, կարողացա՞ ներկայացնել։ Հիմա այդ տարիներին Կառավարության անդամ եղած, Ազգային ժողովի պատգամավոր եղած մարդիկ մեզ ասում են՝ դուք ինչու՞ եք այդ կետերով կանգնում, դուք ի՞նչ է, այդ սահմանը ճանաչում եք։ Բայց չէ՞ որ ձեր ընդունած օրենքով օրենքի ուժ է ստացել դա։ Բա էն ժամանակ ինչի՞ չեն ասել, որ սա Արցախի Հանրապետության տարածքն է, ինչու՞ չեն ասել»։

Վարչապետը նշեց, որ Սյունքի անվտանգությունը երաշխավորված է այնքանով, որքանով արդյունավետ է անվտանգային համակարգը։ «Եվ այսօր, օրինակ, տեսեք, շատ են ասում, բա Ղարաբաղի պատերազմի ժամանակ ՀԱՊԿ-ը ինչու՞, օրինակ, չմիջամտեց։ Էլի նույն պատճառով, որովհետև մեր օրենքում գրած էր, որ մեր սահմանը սա է։ Տեղ գյուղից այն կողմ Ադրբեջանի Հանրապետությունն է, այդ օրենքը ընդունվել է 2010 թվականին, այդ օրենքը ընդունել է 2010 թվականին գործող խորհրդարանը, այդ օրենքը նախագիծը ներկայացրել է 2010 թվականին գործող Կառավարությունը։ ՀԱՊԿ-ը մեզ ասում է, որ սա է ձեր սահմանը, դուք եք նկարագրել այդ սահմանը, մենք ձեր սահմանից դուրս ո՞նց կարանք միջամտություն անենք, և ես ստացել եմ և ստանում եմ բազմաթիվ հավաստիացումներ, և մենք ունենք պայմանագրեր, որ եթե Աստված մի արասցե, ռազմական գործողություններ սկսեն մեր սահմանից ներս, այդ ժամանակ արդեն բոլորվին ուրիշ ռեժիմ է գործելու։ Ինչ վերաբերվում է Արցախին, Արցախի հարցը բոլորովին ուրիշ հարց է, և Արցախի կոնֆլիկտը, Արցախի հարցը միջազգայնորեն ճանաչված հարց է։ Բա իրենք եթե մեզ ասում են՝ փաստորեն եթե մենք այս սահմանով ենք կանգնում, ուրեմն Ղարաբաղի հարցը փակու՞մ ենք։ Եթե դա ճիշտ է, ուրեմն դուք 2010 թվականին ընդունված օրենքով Ղարաբաղի հարցը փակել եք։ ...Եթե սահմանը ճանաչելը այսօր դավաճանություն է, բա 2010 թվին առավել ևս դավաճանություն էր։ Եվ 2010 թվականին գիտեք ով է եղել այս տարածաշրջանի պատգամավորը, և պետք է նայել՝ ոնց ա քվեարկել, համենայնդեպս իր խմբակցությունն է կողմ քվեարկել»։

Քաղաքացիները անընդհատ կրկնում էին, որ պետք է վերջ տալ թավիշին։ «Այո, ժողովուրդ այդ թավիշը անընդհատ որ ասում եք, ճիշտ եք ասում իրականում»։