«Փաշինյան ջան, գիտես՝ Շարմազանովից ոնց եմ զզվում» (տեսանյութ)

ԱԺ պատգամավոր, Քաղաքացիական պայմանագիր կուսակցության վարչության անդամ Նիկոլ Փաշինյանը ԿԸՀ նախագահի ընտրության մասին իր ելույթում անդրադարձավ հոկտեմբերի 2-ին կայացած ՏԻՄ ընտրություններին.

«Նախորդ կիրակի տեղի ունեցան ՏԻՄ ընտրություններ, որոնց որպես վստահված անձ մասնակցել եմ: Այդ ընտրությունների արդյունքում եւս մեկ անգամ հասկանալի դարձավ, որ մեզանում ընտրական հանձնաժողովների դերն ու նշանակությունն ընտրությունների արդյունքների ձեւավորման գործում չափազանցված է»,- ասաց Փաշինյանը:

Փաշինյանի խոսքով՝ ԿԸՀ-ն ընտրական պրոցեսում արձանագրում է ոչ այնքան ընտրությունների արդյունքները, որքան արձանագրում է, թե ով է տվյալ պահին իշխանությունը.

«ԿԸՀ-ն հայտարարել է մի թիվ: Եւ, օրինակ քաղաքական ուժը թավշյա հեղափոխության միջոցով նախագահական նստավայրը գրավում է եւ փաստացի վերցնում իշխանությունը: ՍԴ-ն նրա համար է, որ այս իրավիճակում արձանագրի, թե ով է փաստացի իշխանությունը, ըստ էության, ե՛ւ ԿԸՀ-ի ե՛ւ ՍԴ-ի գործառույթը հենց սա է: Ինչ վերաբերում է ՏԻՄ ընտրություններին, շատ կարեւոր է հասկանալ, թե ինչպես ձեւավորվեցին ընտրությունները: Կարծում եմ՝ ժամանակն է արձանագրել, որ ՀՀ-ում մի ազդեցիկ ընտրական ինստիտուտ, որի մասին ընդունված չէ բարձրաձայն խոսել՝ պայմանականորեն ասած, ընտրական հարյուրապետերի եւ հազարապետերի ինստիտուտ է: Դրանք այն մարդիկ են, ովքեր իրենց թաղերում, շենքերում, տներում ամենամեծ ազդեցությունն ունեն մարդկանց կարծիքի ձեւավորման վրա, նույնիսկ ավելի մեծ ազդեցություն, քան ցանկացած քաղաքական գործիչ: Էս մարդիկ, ըստ էության, միջնորդի դեր են ստանձնում իշխանության եւ բնակիչների միջեւ, տարբեր նյութական եւ ոչ նյութական ծառայություններ մատուցում»,- մանրամասնեց պատգամավորը:

Նիկոլ Փաշինյանի համոզմամբ՝ վերջին  ՏԻՄ ընտրությունների արդյունքներով ընտրական արդյունքներն 90%-ով ձեւավորվել են տեղամասեր եկած քաղաքացիների արված քվեարկության շնորհիվ.

«Ստացվում է, որ Վանաձորում, Գյումրիում եւ ուրիշ համայնքներում ՀՀԿ-ն, ըստ էության, առաջին տեղն է գրավել, եւ ես հասկանում եմ, որ ամեն անգամ, երբ այս ամբիոնից ՀՀԿ-ականներին ասում են, որ ժողովուրդն իրենց ատում է, իրենցից զզվում, հասկանում եմ, թե ինչու է այս դահլիճում խլրտումներ սկսվում, ասում են՝ 30-35 տոկոս ձայն ենք ստացել, էդ ո՞նց եղավ, որ ատում են: Երկար ժամանակ մտածում եմ հետեւյալի մասին, որ օրինակ՝ քաղաքացին ինձ բռնում ասում է՝ այ Փաշինյան ջան, գիտես, որ Շարմազանովը ձեռս ընկնի, փրթիկ-փրթիկ կանեմ, ոնց եմ էս դրանից, կներեք արտահայտությանս, զզվում, նույն ձեւ էլ Շարմազանովին տեսնելիս ասում է՝ Շարմազանով ջան, էդ Փաշինյանը, որ ձեռք ընկնի փրթիկ-փրթիկ կանեմ, չես պատկերացնում ոնց եմ դրանից զզվում»,- ասաց Նիկոլ Փաշինյանը՝ փորձելով բացատրել այս երեւույթի պատճառը:

Պատգամավորի խոսքով՝ Հայաստանում անշահախնդիր ձեւով քաղաքականությամբ հետաքրքրվողների 95 տոկոսը եւ ավելին կոնկրետ շահագրգռվածություն ունի.

«Ես վստահ չեմ. սա պատճառ է, թե՞ հետեւանք. ՀՀ-ում քաղաքականության մեջ ներգրավված գաղափարական մարդ կա՛մ, ընդհանրապես, չկա, կա՛մ զրոյական տոկոս է կազմում: Ես նկատի ունեմ քաղաքական էլիտան եւ ընտրողը, իրան շատ կոնկրետ հետաքրքիր է իր քյարը: Վերջանական արդյունքում իր համար ավելի կարեւոր է ատամի պրոթեզի հարցը կարո՞ւմ ես լուծել, էրեխու վարձը կարո՞ւմ ես տալ, իրան գործի կարո՞ւմ ես ընդունել, իր ռեցեդեվիստ ախպորը բանտից կարո՞ւմ ես հանել: Էս է  քաղաքական գործոնը, ու հասկանալի է, որ ՀՀ-ում հիմնական քաղաքական գործոնը փողն է: Հիմա մենք նայում ենք՝ էս ո՞նց եղավ, որ ՀՀԿ-ին, ԲՀԿ-ին, էն մեկին քվեարկեցին, շատ պարզ եղավ՝ իրանք ամենամեծ փողն ոնց են ծախսել էս ընտրությունների վրա»,- ասաց նա՝ հավելելով, որ այն պարտադիր չի, որ հենց ընտրական պրոցեսների ժամանակ օգտագործվեր, եղել է նաեւ բարեգործության տեսքով:

«Դա դեղ է, կոշիկ է, օպերացիա է, կապ չունի»,- մանրամասնեց պատգամավորը:

«Հիմա էստեղ հարց է ծագում. ի՞նչ պետք է անի էն ընդդիմությունը, որը կցված չի որեւէ օլիգարխի, պարզ է, որ պետք է գտնի համախոհներ եւ այդ խումբն առանց հոգնելու, հետեւողական, անընդհատ պետք է զարկի էս պատը: Պարտվելով, ձախողվելով, կոտրվելով, ծեծվելով, ձեռ առնվելով, էս է ճանապարհը, ուրիշ ոչ մի ճանապարհ չկա, որովհետեւ փոփոխությունների միակ հիմքը ժողովրդի կամարտահայտությունն  է, ուրիշ հիմք չի կարող լինել:

Ուզում եմ նորից անդրադառնալ հին բանավեճին՝ հեղափոխությո՞ւն, թե՞ ընտրություն: Էն ուժը, որն ընտրություններում 3.5 տոկոս է հավաքում, երբեք չի կարող հաջողված հեղափոխություն անի, բացառված է դա: Եվ հակառակը՝ այն ուժը, որն ի վիճակի է հաջողված հեղափոխություն անել, կարող է նաեւ ընտրություններում հաղթել: Ուզում եմ նաեւ Սասնա ծռերի հետ կապված պատմությանն անդրադառնալ, էլի կասկածով եմ վերաբերվել էն մարդկանց, անգամ ուղիղ ասել եմ դու հաստատ ԱԱԾ գործակալ ես, որ ասում էին՝ արա, սրանց խփել ա պետք, էդ ինչ ընտրությունների մասին եք խոսում, զենք տվեք գնանք փրթենք, թափենք: Հենց էս մարդիկ են Սասնա ծռերի տղերքին էդ հուսահատ քայլին դրդել, բայց երբ ծռերն ասացին ապստամբության կոչ ենք անում, վեր կացե՛ք, զենքերը վերցրե՛ք, քանի՞ հոգի կանգնեց ու զենք վերցրեց:

Սա  մեր քաղաքական իրողություններն է: Ամփոփելով ուզում եմ ասել, ուրեմն՝ ՀՀԿ, ԲՀԿ, ՀՅԴ, ՕԵԿ Գյումրիում իրար հետ ստացել են ձայների 72 տոկոսը, Վանաձորում՝ 65 տոկոսը: Էդ չորս ուժը 2008-ից հետո տարբեր փուլերով եղել են իշխանության, էս քաղաքացիներն իրենց ընտրություններով ուղիղ արձանագրեցին իրենց համահեղինակությունը 2008 թվականից հետո ՀՀ-ում տեղի ունեցած բոլոր արատավոր երեւույթներին: Սա փաստ է, որը հնարավոր չի հերքել»,- եզրափակեց Փաշինյանը:

Նիկոլ Փաշինյանի ելույթից հետո արձագանքեց Էդուարդ Շարմազանովը՝ կոչ անելով խորհրդարանական բառապաշարով խոսել.

«Երկրորդը՝ զզվելը լավ բան չի, թույլ մարդիկ են զզվում, բերեք իրար հարգենք, համերաշխ աշխատենք»,- ասաց նա: