Ապրիլյան պատերազմում վիրավորված Ռոլանդն ու Ավետիսն առայժմ արտերկիր չեն տեղափոխվի

Ապրիլյան պատերազմում վիրավորված զինծառայողներից երկուսը` Ավետիս Զարգարյանը եւ Ռոլանդ Սահակյանը, դեռեւս գտնվում են պաշտպանության նախարարության կենտրոնական զինվորական հոսպիտալում:

Ռոլանդի հարազատների ունեցած տեղեկությունների համաձայն, ՀՀ առողջապահության նախարարությունում գործող միջգերատեսչական հանձնաժողովը նրա խնդրով երկրորդ անգամ է նիստ գումարել ու բուժումն արտերկրում շարունակելու վերաբերյալ տվել դրական եզրակացություն: «Մի երկու օր առաջ նորից են քննարկել, որ երեխային արտասահման են տանելու: Կոնկրետ օրը որոշելու համար պիտի իրենք թղթաբանությունը նայեն, կողմնորոշվեն, տեղափոխեն: Հանձնաժողովը տվել է դրական եզրակացություն»,- մեր զրույցում ասաց Ռոլանդի հայրը` Քաջիկ Սահակյանը: Թե որ երկրում ու որ կլինիկայում է որդին շարունակելու բուժումը, հայրը չգիտեր:

«Մեզ ոչ մի բան չեն տեղեկացրել: Մեզ միայն ասել են, որ պիտի արտերկիր տանեն»,- հավելեց նա: Քաջիկ Սահակյանը նաեւ տեղեկացրեց, որ մոտ մեկ շաբաթ առաջ որդին եւս երկու վիրահատության է ենթարկվել պառկելախոցերի կապակցությամբ: Այդպիսով, վիրավոր զինծառայողի վիրահատությունների թիվը դարձել է տասներկու: Հիշեցնենք, որ Ռոլանդն ունի ողնաշարի վիրավորում, ինչի հետեւանքով անշարժացած են ստորին վերջույթները: Զինծառայողը ստացել է նաեւ մի շարք ներքին օրգանների վիրավորում: 

ՀՀ առողջապահության նախարարության բժշկական օգնության քաղաքականության վարչության պետ, նշված հանձնաժողովի մշտական անդամ Ծաղիկ Վարդանյանը, սակայն, մեր զրույցում տեղեկացրեց, որ թե՛ Ռոլանդ Սահակյանի, եւ թե՛ Ավետիս Զարգարյանի բուժումն արտերկրում շարունակելու վերաբերյալ հանձնաժողովը չունի դրական եզրակացություն: Ընդ որում, ըստ նրա, այդ հարցը երկրորդ անգամ քննարկման չի դրվել: Տիկին Վարդանյանը նշեց, որ հանձնաժողովի նիստին մասնակցած բժիշկ-մասնագետներն այն համոզումն են ունեցել, որ երկու երիտասարդի առողջական վիճակի բարելավման ուղղությամբ Հայաստանում դեռ կան անելիքներ ու որոշակի հնարավորություններ:

Ավելի վաղ, սակայն, հոսպիտալի բժիշկները Ավետիսի վերաբերյալ, ի տարբերություն Ռոլանդի, կարծիք էին հայտնել, որ նրա տեղափոխումը կարող է ավելի արդյունավետ լինել` նշելով, որ այստեղ, ըստ էության, ավարտել են վիրավոր զինծառայողի բուժումը ու արել ամենը, ինչ որ առկա հնարավորությունների սահմաններում է: Ասել էին նաեւ, որ ցանկացած պահի կարող են երիտասարդին դուրս գրել` հետագա վերականգնողական բուժման տեղափոխելու նպատակով:

«Ես, որպես քաղաքացի (չասեմ` որպես բժիշկ, զինվորական), գտնում եմ, որ ավելի լավ է` Ավետիսը վերականգնողական բուժում ստանա արտասահմանում, չնայած այն բանին, որ մեր «Կարմիր խաչում» մեր վիրավորներից շատերը բուժվում են եւ իրենց մոտ էլ առողջական վիճակի, շարժումների մեջ առկա է լավ արտահայտված դրական դինամիկա»,- ավելի վաղ մեր զրույցում կարծիք էր հայտնել հոսպիտալի նեյրովիրաբուժական բաժանմունքի ղեկավար Հրայր Աճեմյանը: 

«Ավետիս Զարգարյանի խնդրով քննարկման ժամանակ այստեղ են եղել իր բուժող բժիշկը, հոսպիտալի վերակենդանացման ծառայության ղեկավարը եւ մյուս բժիշկները, որոնք մասնակցություն են ունեցել վիրաբուժության պրոցեսում, եւ նրանք ամեն դեպքում համաձայնեցին, որ այս պահին դեռեւս գործ ունենք անելու: Երբ վիճակն այնպիսին կլինի, որ Հայաստանում այլեւս քայլ չի լինի անելու, մենք համապատասխան կարգով կարծում եմ թե կանդրադառնանք: Որեւէ խնդիր չկա:

Կարծում եմ` մենք բաց, անաչառ ձեւով աշխատում ենք, բոլոր տղաներն էլ մեզ համար թանկ են: Եթե մասնագետներն ասում են` դեռ ոչ, ես պարտավոր եմ մասնագիտական կարծիքը հաշվի առնել»,- ի պատասխան ասաց վարչության պետը:

Վիրավոր զինծառայողների արտերկրում բուժման նպատակահարմարությունը քննարկող միջգերատեսչական հանձնաժողովը, որը սկսել է գործել վերջին ամիսներին, հինգ այդպիսի հարց է լսել: Ապրիլյան պատերազմում վիրավորված եւ դեռեւս հոսպիտալում գտնվող Ռոլանդի եւ Ավետիսի վերաբերյալ, ինչպես նշեցինք, եզրակացությունը եղել է բացասական: Մյուս երեք նախկին զինծառայողների դեպքում այն դրական է եղել: Նրանք բոլորը վիրավորվել են ավելի վաղ` նախորդ տարիներին` զինվորական ծառայության ընթացքում: Երկուսի` Մհեր Պետրոսյանի եւ Աշոտ Գրիգորյանի արտասահմանում բուժման համար կառավարությունը գումար հատկացրեց վերջին նիստում:

Երրորդ զինծառայողի` Ռուզվելտ Թորոսյանի վերաբերյալ առողջապահության նախարարությունում գործող հանձնաժողովը դրական եզրակացություն է տվել շուրջ 10 օր առաջ: 2014 թվականին վիրավորված զինծառայողը կտեղափոխվի Մոսկվա: Նրա մոտ առկա է գանգուղեղային տրավմա եւ աչքի վնասվածք: «Որպեսզի կարողանանք պահպանել տեսողությունը, ակնաբույժները` Ալեքսանդր Մալայանի գլխավորությամբ, գտան, որ նախկին զինծառայողը պետք է տեղափոխվի արտերկիր»,- մանրամասնեց Ծաղիկ Վարդանյանը:

«Մենք բացառապես քննարկում ենք բուժական հարցերը: Մնացածով` ճանապարհածախսի բաղադրիչ, հիվանդի մնալու ծախսեր եւ այլն, զբաղվում են պաշտպանության նախարարության համապատասխան ստորաբաժանումները: Բայց որպեսզի նրանք զբաղվեն, պետք է լինի հանձնաժողովի դրական եզրակացություն»,- ասաց նա:

Լուսանկարում Ռոլանդ Սահակյանն է