Ոչինչ չի կարող խանգարել ինձ իմ երազանքին հասնել. Հենրիխ Մխիթարյանն ասաց եւ արեց

Հայաստանի դրոշն ուսերին ու Եվրոպա լիգայի գավաթը ձեռքին Հենրիխ Մխիթարյանը Ստոկհոլմի «Ֆրենդզ Արենա» մարզադաշտում, մի խաղից հետո, որի ընթացքում նա խփեց վճռորոշ գոլերից մեկը.... Հենոն դարձավ Հայաստանի առաջին քաղաքացին, որը եվրոպական գրանդներից մեկի կազմում մասնակցեց եվրագավաթների եզրափակչին, գոլի հեղինակ դարձավ ու հաղթեց: Եվ այսքանը՝ «կարմիր սատանաների» կազմում ավելի քան բարդ մեկնարկից հետո: Թեեւ զարմանալի չէ, որովհետեւ «Փյունիկից» «Մետալուրգ», «Մետալուրգից» «Շախտյոր», ապա «Բորուսիա» եւ ի վերջո «Յունայթեդ» նրան երբեք էլ հեշտությամբ ոչինչ չի տրվել: 

2016 թ. ամռանը «Մանչեսթեր Յունայթեդ» տեղափոխվելուց հետո նա անմիջապես դարձավ երկրպագուների սիրելին: Նրանք Հենոյի մեջ տեսնում էին թիմի ավագ Ուեյն Ռունիի արժանի փոխարինողին: Սակայն քմահաճ գլխավոր մարզիչ Ժոզե Մոուրինյոյի համար երկրպագուների ոգեւորությունը ոչ մի նշանակություն չուներ: Ամեն սխալից, անհաջող խաղից հետո նա առանց վարանելու պահեստայինների նստարան էր ուղարկում Հայաստանի հավաքականի ավագին: ԱՊԼ 4-րդ տուրի «Մանչեսթեր Սիթիի» (1:2) դեմ դերբիում դժգույն 1-ին խաղակեսից հետո էլ Մխիթարյանը մոտ 2 ամիս անգամ 1 րոպե չանցկացրեց խաղադաշտում: Լրատվամիջոցները սկսեցին խոսել «Յունայթեդում» նրա մշուշոտ ապագայի մասին, թվարկել ակումբները, որտեղ նա կարող էր հայտնվել 2017 թ. հունվարյան տրանսֆերային պատուհանի ընթացքում, երկրպագուները սկսեցին հուսահատվել, սակայն Մխիթարյանը շարունակեց լուռ աշխատել:

«Ամեն ինչ շատ լավ է: Թեեւ քիչ խաղային ժամանակ եմ ստանում, բայց դա խոչընդոտ չի կարող հանդիսանալ, որովհետեւ շատ երկար ճանապարհ եմ անցել, որպեսզի հասնեմ այստեղ: Կարծում եմ, որ ոչինչ չի կարող ինձ խանգարել իմ երազանքին հասնել ու առաջ շարժվել, քանի որ, եթե այս պարագայում ես հանձնվեմ, կստացվի, որ ոչինչ չեմ արել այնտեղ հասնելու համար: Փորձելու եմ իմ մեջ ուժ գտնել ու պայքարել իմ ուզածին հասնելու համար»,- ասաց նա՝ 2016 թ. նոյեմբերի սկզբին Երեւանում լրագրողների հետ հանդիպման ժամանակ պատասխանելով armtimes.com-ի հարցին:

^{2016 թ. հոկտեմբերի 30-ին Մխիթարյանը միայնակ է մարզվել}

Մխիթարյանը խաղադաշտ վերադարձավ նոյեմբերի վերջին՝ Եվրոպա լիգայի խմբային փուլի «Ֆեյենորդի» դեմ խաղում եւ թեեւ գոլ չխփեց, սակայն լավագույնն էր «ՄՅՈՒ»-ի կազմում: Այդ օրվանից նա դարձավ թիմի առանցքային խաղացողներից մեկը: Խմբային փուլի հաջորդ տուրում հայ ֆուտբոլիստը գրավեց «Զարյայի» դարպասը: Օրեր անց «Թոթենհեմի» դեմ խաղում խփեց ԱՊԼ-ում եւ «Օլդ Թրաֆորդ» մարզադաշտում իր առաջին գնդակը՝ հանդիպման միակ եւ հաղթական գոլը: Այդ խաղը, սակայն նա չավարտեց, վնասվածք ստացավ, փոխարինվեց ու վերադարձավ 2 տուր անց՝ «Սանդերլենդի» դեմ խաղում, որտեղ էլ խփեց «Մանչեսթեր Յունայթեդի» մրցաշրջանի լավագույն գոլը՝ «կարիճ» հարվածով գոլը, որը նա նկարագրեց որպես լավագույնն իր կարիերայում:

^{Մխիթարյանի «կարիճ» հարվածով գոլը}

Պակաս գեղեցիկ չէր նաեւ Եվրոպա լիգայի եզրափակչում ակրոբատիկ հարվածով խփած գոլը Քրիս Սմոլինգի փոխանցումից հետո: Դա նաեւ շատ կարեւոր գնդակ էր, քանի որ 1:0-ի ժամանակ «Այաքսի» ճնշումը վտանգավոր էր: Մխիթարյանը ճանաչվեց հանդիպման լավագույն ֆուտբոլիստ: Խաղից հետո էլ ՈՒԵՖԱ-ի պաշտոնական կայքին տված հարցազրույցում պատմեց՝ ինչպես է խփել գոլը մի դիրքից, որտեղ ինքը չպետք է լիներ:

«Անկեղծ ասած, ես չպետք է լինեի այդտեղ: Պետք է տուգանայինի մատույցներում լինեի, բայց քանի որ դեղին քարտ ունեի, Անդեր Էրերան ասաց, որ ավելի լավ կլինի մնամ դարպասապահի առջեւում: Ես տեսա գնդակը, բարձրացրի ոտքս եւ այդպիսի տպավորիչ գոլ խփեցի»,- ասել է նա:  

Այս գոլը պատմական էր «Յունայթեդի» համար: Բացի նրանից, որ Մխիթարյանն օգնեց իր թիմին նվաճել հերթական եվրոպական գավաթը, ուրախացրեց «Յունայթեդի» երկրպագուներին եւ հպարտանալու առիթ տվեց հայերին՝ նա նաեւ ռեկորդ սահմանեց: Հենոն դարձավ «Յունայթեդի» առաջին ֆուտբոլիստը, որը 1 մրցաշրջանի ընթացքում գոլի հեղինակ է դառնում եվրագավաթների 5 տարբեր խաղերում: «Այաքսից» առաջ նա գրավել է նաեւ «Զարյայի», «Սենտ Էտյենի», «Ռոստովի» եւ «Անդերլեխտի» (2 անգամ) դարպասը:

Սա Մխիթարյանի 6-րդ գոլն էր Եվրոպա լիգայի այս մրցաշրջանում: Ընդհանուր առմամբ՝ անգլիական թիմում իր առաջին մրցաշրջանում նա բոլոր մրցաշարերում դարձել է 11 գոլի հեղինակ: Եվրոպա լիգայի գավաթն էլ նրա 3-րդ տիտղոսն էր «Յունայթեդում»: 2016 թ. օգոստոսին թիմի հետ նվաճել է Անգլիայի սուպերգավաթը, իսկ այս տարվա փետրվարին՝ Անգլիայի լիգայի գավաթը:

«Շախտյորում» 1 մրցաշրջանում խփած գոլերի քանակով (25) նա դարձավ Ուկրաինայի առաջնության ռեկորդակիր (2012-13): Դորտմունդի «Բորուսիայում» ճանաչվեց 2015-16 առաջնության լավագույն ֆուտբոլիստ, այժմ էլ «Յունայթեդի» առանցքային խաղացողներից է: Նա պատմություն է կերտում ոչ միայն հայկական ֆուտբոլում, որն «Արարատ 73»-ից հետո նման փառահեղ օրեր չի ունեցել, այլեւ «Մանչեսթեր Յունայթեդում»: Նրա կարիերայի ավարտից հետո հայ ֆուտբոլասերները կհպարտանան ոչ թե պարզապես այն փաստով, որ նրա անունը կապվում է անգլիական գրանդի հետ, այլեւ նրա գեղեցիկ, որոշիչ գոլերով, սուր փոխանցումներով, նվաճած գավաթներով: Մեկ օր էլ գուցե Մխիթարյանին տեսնենք Հայաստանի դրոշն ուսերին ու արդեն Չեմպիոնների լիգայի գավաթը ձեռքին: