Ինչ աշխատանքներ են տարվում 2018 թվականին հրդեհված Մաշտոցի գետնանցումում

Երեւանի Մաշտոցի պողոտա-Լուսավորիչ-Պարոնյան փողոցների խաչմերուկի ստորգետնյա անցումը մարտի 3-ին հրդեհվել է: Գարշահոտ տարածող գետնանցումը, ի դեպ, քաղաքապետարանի համար գլխացավանք էր դարձել, իսկ քաղաքապետի տեղակալ Կամո Արեյանին վերջին շրջանում հաճախ կարելի էր տեսնել այստեղ՝ շրջելիս, ուսումնասիրելիս:

«Հայկական ժամանակ»-ի լրագրող Աննա Զախարյանի հետ զրույցում հրդեհի ականատես բնակիչը պատմել է, որ դեպքի վայրում աշխատող քննիչն իրեն հարցրել է, թե իր կարծիքով ինչը կարող էր հրդեհի պատճառ դառնալ: Կինը, ինչպես պատմել է մեր լրագրողին, պատասխանել է, որ կա՛մ էլեկտրալարերը, կա՛մ էլ այդտեղ ապրող անօթեւանները: Հոսանքալարերի պատճառով կրակի առաջացման հավանականությունը, ըստ բնակչի, քննիչը բացառել է՝ պարզաբանելով, որ մալուխները բաց չեն:

Երեւանի քաղաքապետարանի տեղեկատվության եւ հասարակայնության հետ կապերի վարչության պետ Արթուր Գեւորգյանը ՀԺ-ի լրագրողի հետ զրույցում հայտարարել է, որ նախկին խանութների այդ տարածքի սեփականատերերը պատշաճ կերպով չեն կատարել իրենց պարտականությունները:

Կարծիք կա, որ ստորգետնյա անցումի սեփականաշնորհված հատվածում բռնկված հրդեհը հնարավոր է միտումնավոր է եղել: Դա քաղաքապետարանի շահերից կարող էր բխել այն առումով, որ եւս մեկ փաստարկ կլինի՝ սեփականատերերին ապացուցելու, որ տարածքի ներկայիս բարձիթողի վիճակը, բացի հակահիգիենիկ լինելուց, նաեւ վտանգավոր է, հետեւաբար տարածքի բարեկարգման աշխատանքներն անհետաձգելի են ու պետք է հրաժարվել դրա նկատմամբ իրավունքներից:

13:10, 23/01/2019

Ինչ աշխատանքներ են տարվում 2018 թվականի մարտի 3-ին հրդեհված Մաշտոցի գետնանցումում:

808 դիտում